Nê rojan de serrgêrêka newe ya xoverdayîşê Kobanê yena pîrozkerdiş. No xoverdayîş ser o xeylê şîrove, vînayîş û fikrî ameyî vatiş. Do hîna zî analîzê ci bêro kerdiş, bêro şîrovekerdiş, bibo babeta romanan û fîlmê ci bêrî antiş. Reyna do hîna zaf huner, edebîyat, têkoşîn û xoverdayîşê azadîye rê bibo îlham. Şarê bindestî û cinîyî do hertim bi îftîxar û rûmetî reyde bîyarê xo vîr. Seba ke rayberîya cinîyan de xoverdayîşêko tarîxî ame nîşandayîş, Roja Kobanê ya Dinya ameye îlankerdiş. Na heqîqet bi vatişê ‘Cinîyê rindî zorê camêrdanê pîsan bêrdî’ bîye slogan. Raştîya xo de tena zorşîyayîşê camêrdê pîsî nêbî, wayîrê sewbîna manayan zî bîye.
Ewro na raştîya ke ser nameyê aye de dinya de roje ameya îlankerdiş, perspektîfê îdeolojîkî, raştîya Rayberîye û kulturê xoverdayîşî ra qerfîyaye nîya. Gelo merdim şêno na raştîye nînan ra qerfîyaye bigîro dest? Helbet no mumkin nîyo. Seke yeno zanayîş raştîya Rojawan, Sûrîyeya Vakure û pêroyîya Sûrîye Kobanê ra ver û Kobanê ra dima cîya bîye. Eke ewro Sûrîye de newe ra prosesê çareserîye dest pêkerdo û îmkanê pîya cuyayîşî xelq bîyo, no saya xoverdayîşê Kobanê yo.
Labelê herkes zano ke no xoverdayîş paradigmaya Rayber Apoyî ra qerfîyaye nîyo. Yê ke nê xoverdayîşî rê rayberî keno û ruhê têkoşîn û xoverdayîşî awan keno, paradigma û îdeolojîyê Rayber Apoyî yo. Labelê Rayber Apo ewro binê tecrîdêko girankerde, hêriş û tehdîdî de yo. Hetê ke piştî dayî û beşdarê prosesê xoverdayîşê Kobanê bîyî, ewro seba weşî, ewleyî û azadîya Rayber Apoyî nêkewenî dewre û no paradoksêko gird o. Yan nêşênî tayê çîyan bi hawayo raşt bîyarê ziwan, yan zî rewşêka ke bi hawayo zanaye nêverdana paradîgmaya Rayberîye hetê cinîye û şaran ra bêro dîyayîş. Herkes feyza ke cinîye û bindestî paradîgmaya Rayberîye ra gênî, vîneno û zano. Bi hawayo aşkere yeno zanayîş ke averşîyayîşo enternasyonalîst zî nêy reyde eleqeder o. Rojawan de bi seyan merdimê enternasyonalîstî şehîd kewtî. Reyna têkoşîn û xoverdayîşê xeylê cayan de xoverdakarî dîyar kerdî ke ê hêzê xo paradîgmaya azadîye ra gênî. O wext na rewşe bi hawayo zanaye manîpulekerdiş, hêriş û çinî hesibnayîş o. No derbaznêkerdişê na rewşe reyde eleqeder o.
Hesaban ra seba vernîgirewtişê şer û pêrodayîşî, kêmîkerdişê neheqî û tedayan dezgehêko mîyanneteweyî reyde pêvînayîşêkî amebî viraştiş û o pêvînayîş de qala qehreman, şervan û averşîyayîşanê Rojhelato Mîyanên rê senî rayberî kerdo, ameyêne kerdiş. O wext cinîya ke nêy xelq kerdo, kam a, no kamcîn îdeolojî yo û bingeyê ci de kamcîn fikir û paradigma estî? Wexto ke qale yena şinasnayîş û qebulkerdişê nê fikir û paradigma, heme çî bedilîyeno. Na qale heme raştîyan vana. Bitaybetî no het de vindetişê hêzê rojawanî, grubê menfîetî û tayê dormeyî no yo. Ê zî qebul kenî ke paradigmaya ke Rayber Apo rayberîya ci keno, averşîyayîşêko muazam xelq kerdo. Ê zanî û qebul kenî ke nê erjê demokratîkî Rojhelato Mîyanên de averşîyayîşê muhîmî awan kerdî. Bi no hawa ewnîyenî. Nînan bi hawayo bîyaye vînenî û hewl danî nînan ra sud bigîrî. Hetta ê vanî eke wina bibo, ma eşkenî hêz û destek zî bidî. Labelê wexto ke babete bena Rayber Apo, o wext dirîtîya înan vejîyena orte.
Seba cinî û şarê ke têkoşînê azadî meşnenî, nêbîyayîşê şert û mercê çareserîya sîyasî û demokratîke sebebê şerî yo. Eke têkoşîn goreyê hêzê cewherî bêro dayîş, o wext şar û cinîyî qezenç kenî. Labelê tîya de rantwerê şerî zî bi hawayêk ewja de estî û seba ke estena xo qewîm bikerî, kewenî mîyanê hewldayîşan. No zî raştîya şer û netîceyê ci yo. Wexto ke qala xoverdayîşê Kobanê û Rojawanî yeno kerdiş, ganî qala Arîn Mîrkane, Gelhat, Paramaz û Revan bêro kerdiş û eke wina bibo o wext heqîqeta xoverdayîşê Kobanê bi hawayo raşt yeno vatiş. Kobanê serkewtişê paradîgmaya demokratîke, ekeolojîke û azadîya cinîye ya.