Koçberê Sûrîye her roje bajaranê cîya-cîyayan yê Tirkîya de raştê hêrişan yenê û bi vatişanê xiraban benî hedef. Nê bajaran ra yewe zî Îzmîr o. Goreyê cigêrayîşanê fermî Îzmîr de nizdîyê 80 hezar sûrîyeyijî estî. Labelê goreyê xerîteya aşma sibate na hûmare raştîya xo de 100 ya zî 500 hezar a. Polîtîkayê hukmatî û ziwanê çapemenî benê sebebê hêrişan.
Babete ser o koçber Fadil L., Abdullahman M. û Endamê Komeleya Piştî û Piştîdayîşê Kulturî ya Afrîka (Afro-Turk) Yalçin Yanikî qisey kerdî.
Fadil L.yo ke bi 4 domaannê xo Heleb ra koçê Tirkîya kerdo, wina va: “Mi 3 serran de qertê xerîbî girewt. Her ca de merdimê ke nîyetê înan xirab o, estî. Ma her roje televîzyonan de xeberê hêrîşan vînenê. Cok ra ma tersenê. Ma vînenê ke tîya de endamê DAIŞ û Hîzbullahî estî. Merdim terseno ke hêrişêk bibî.”
Zulmeêko cîya
Abdurahman M.yo ke wayîrê 2 domanan o, wina va: “Xeylê nêweşîyê mi estî û 5 serrî yo ke ma tîya de cuyenî. Ma do roşanê qurbanî de biagêrî Sûrîye. Ma ferqê heme hêrişan de yî, la destê ma ra çîyêk nîno. Ma zulmî ver Sûrîye ra remayî û ameyî tîya, la ma Tirkîya de kewtî mîyanê zilmêko cîya.”
Yanikî zî wina va: “Xeberê xirabî benê sebebê hêrişan. Ganî çapemenî dîqat bikera ziwanê xo. Çapemenî her gama koçberan şopnena û hedîseyê şenikan bi hawayo pîl nawnena. Ganî xeberan de ziwanê piştî bêro xebetnayîş.”
ÎZMÎR - DÎHABER