Qezaya Riha Sêwereg herema Qerejdax de Koçerê ke xêman de weşî kenê debara xo bi wayîr kerdişê heywanan û bi berhemê ci şit, penîr, mast ûsb. kenê. Bi aşmanê zimistanî ra pîya koçerî şinê dewanê xo, la bi vilêşnayişê vewrî ra pîya ageyrenê xozaya natur, bê ceyran û bi awa çime zey leteyekê xoza weşî kenê.
Weşî hetê cenîyan organîze beno
Cenîyê koçer seatanê rew yê şodir de werzenê bi çerînayişê heywanan destpa roj kenê, şit doşenê, kenê mast û penîr. Cenîyê emegdar mavêna xo de cuye komunal ronayê. Nê cenîyan ra Berfîn Tûran ke her serr aşmanê wesarî ra tepya zozananê Tirşo yê Qerejdax de xêm ronena ya.
Tûran dana zanayiş ke aşmê Nîsan de şinê zozanan û xêmanê xo ronenê û aşma Mijdarî de zî peyser ageyrenê dewanê xo. Tûran aşkere kena ke rîwalo ke dewa înan û keyeyê înan çinyê dewanê bîn de bi dayişê kêmekê pere manenê. Tûran vana ma koçer ê û wina behsê weşîya xo ya rojane kena: “Zozanan de cuye hetê cenîyan organîze beno. Ma sodir seat 5î de benê ra û heta 9ê şanî gurîyenê. Cemêrdî kamcî karî bikerê ra ma qerar danê, la cenî goreyê camêrdan hewna vêşî gurîyenê. Ma yem danê heywanan rê, şamî virazenê, domanan wayî kenê. Penîr û mast virazenê. Karê ma zaf giran o.”
‘Ma nêşenê zozanan ra biqerfê’
Cenîya bîn a koçer Sarê Tûran zî ana ser ziwan ke ê nêşenê zozanan ra biqerfê û dana zanayiş ke tenya aşmanê zimistanî de şinê dewanê çorme. Tûran aşkere kena ke cenî her cayî de wayrê înisîyatîfî yê û wina vana: “Cuye tiya zaf zehmet o. Camêrdî hewna vêşî kenê zehmet. Karê ma çiqe zehmet bo zî ma zozanan ra nêşenê biqerfê.” Dapîra 70 serrî Hamse Bagatemûr ke çormeyê Qerejdax dewa Kûzûlkoy de bi serrano weşî kena û heywanan kena wayî zî dana zanayiş ke seatanê şodir ra heta seatanê berey gureyêna.
Bagatemur ke rixmê emrê xo yê pîr zî dînç û xûrt aysena vana ke a nayî deyndarê berhemanê natur û zozanan a. Bagatemur zî dana zonayiş ke ê nêşenê zozanan ra biqerfê û aşkere kena ke xêlê qeçekê (domanê) înan nêzanê sûkî senînê, nêşinê mekteb. Bagatûm dîyar kena ke embazê qeçekanê ma heywanî yê, darî yê, çîçegî yê.
DÎHA/RIHA