Seba  24. Festîvala Kulturî yê Kurd mordnayişê peynî destpa kerd.  ‘Festîvala Azadî û Demokrasî yê Şaran û Îtiqatan ke emserr 3ê Îlone de sûka Almanya Koln de virazîyena hadreyînê ci qedîyay. Midûrîna Emnîyetî yê Koln aşkere kerd ke seba ke festîval rind û bê mesele ravêro pêrokîn tedbîrê hewce ameyê giroten. NAV-DEM, TJKE û CDK-F vengdayişê tewrbîyena festîval day. 

Seba 24. Festîvala mavên netewî pêrokîn destûrê qanûnî ameyê dayen û festîval do Meydanê Deûtzer Werft de virazîyo.  Heto bîn ra seba nîjadperweranê kurd ke waştî 3ê Îlone de nûmayişeke virazê û provakasyon vejerê rê destûr nêame dayen. Yeno pawiten ke Hemserokê HDP Selahattîn Demîrtaş, Hemserokê Salîh Muslîm, Hemserokê Dîe Lînke Bernd Rîexînger zî zey qiseykerdoxî tewrê festîval bibê. Bernameyê kulturî yê festîval de kî performans û aktivîteyê rengînî dê ca bigîrê. Bi desan komê muzîk û hunermendê namedar zî dê festîval de sehne bigîrê.


NAV-DEM veng da

Desteyê Kordînasyonê Navendê Civaka Demokratîk yê Kurdê Almanya bi damûstayîneke aşkere kerd ke festîval bin slogananê “Ocalanî rê Azadî, Kurdistanî rê Statu” û “Bi Rihê Xoverdayişê Xoserî Azadîya Rayver Apo û Kurdistanî biyarime ca”, “Dûştê her şiklê derbe, dîktatorî û faşîzmî biciwe tekoşînê azadî û demokrasî yê şaran” virazîyeno.  NAV-DEM vist vîrî ke festîvala emserr raştê îşgalê artêşa tirk yê Rojawa, tecrîdê girankerdî yê ser Ocalan û êrişanê dewleta tirk yê dûştê kurdan û çormeyanê muxalîf yena. Nayî ra NAV-DEM veng da şarê kurd û dostanê ci ke 3ê Îlone de festîvala 24. de bîrê pêhet.   


Dûştê jûyayî pir rengî

Seba festîval jew vengdayişê tewbîyayen zî Hereketê Banî yê Cenîyanê Kurd TJK-E ra ame. TJK-E cenîyan ra waşt ke bi kincanê xo yê gelerî tewrê festîval bibê. TJK-E da zonayen ke quwetanê mavên netewî dûştê reng û kulturê şaran herb dayo destci kerden û wina vajîya: “Demo ke ma mîyan ra vêrenê ra, şexs dê şarê kurd de wextê seveknayişê bîyayişê şaranê Rojhelatê Mîyanî û însanîyetî yo. Sîstemê kapîtalîst û quwetê îxtidara mavên netewî dûştê kamî û kulturê şaran zerreyê herb de ya. No herbo ke pêrokîn cografyeya dinya gêno mîyanê xo vera civakbîyayişê şaran o û polîtîkayanê asîmîlasyon û entegrasyonî frez keno.”

TJK-E da zonayen ke no êrişo ke hetê zihnîyetê dewlet netewan yeno ramiten terzê weşî ya jû mîlet, jû zihnîyet, jew ziwan û jew kultur ferz keno û va, ganî dûştê nayî de ma damûsnê ke rengînî û ciyabîyayen dewlemendîya weşî ya.  TJK-E aşkere kerd ke ganî dûştê tek tîpbîyayişî de seba weşîya azad tekoşîn bîro berzkerdiş û va: “Jew îfadeyê na tekoşîn zî helbet nûmayişî yê.”


‘Bi kincanê netewî tewr bibê’

TJK-E hayr ant muhîmîya Festîvala Kulturî ya Kurd ser û wina va: “Festîvala ke her serr yena viraşten jû hetî ra wayîrvejyayişê erjanê xo yê kulturî û kamî yo, heta bîn ra ciwîyayişê nînan o. No dûştê polîtîkayê ke yenê ferzkerdiş de tewir û vinderdişekê yo. Zey Hereketê Cenîyan verikîn veng danime cenîyan, gencan û pêrokîn şarî ke bi kincanê (çina) xo yê netewî û bi renganê xo Koln de tewrê festîval bibê.


Verîgirotişê faşîzmî tekoşîna pîyayî ra ravêreno

Civaka Demokratîk yê Kurdê Fransa CDK-F zî kurdê ke Fransa de ciwîyenê silayînê festîval kerd. CDK-F waşt ke herkes bi slogana “Roj wayîrvejyayişê hard, kultur û Rayverîye xo yo” tewrê festîval bibê. CDK-F bi damûstayîneke da zonayen ke dewleta faşîst ya tirk dûştê kurdan herbê topyekun û polîtîkayê îmha visto dewre û hayr ant tecrîdo verra Ocalanî, êrişê verra çapemenîya kurd ser.  CDK-F da zonayen ke nê êrişê faşîzan yê dewleta tirk dê rojanê vernî de  zî dewam bikerê û va verîgirotişê no faşîzmî berzkerişê tekoşîna pîyayî yo. Civaka Demokratîk yê Kurdê Fransa veng da Kurdistanijanê ke Fransa de ciwîyenê û dostanê ci ke bi quwetekê gird tewrê festîvala 24. ya Koln bibê.

Konseyê Civaka Demokratîk yê Kurdê Hollanda DEM-NED zî veng da kurdê ke Hollanda de ciwîyenê ke tewrê festîval bibê.


Gencan ra rayşîyayiş

Heto bîn ra gencanê kurd emserr zî verîya festîval vizêr bi şîyara “Em Rabin bi tolhildan, têk bibin dagirkerî, azad bikin Rêbertî“ sûka Almanya Dûîsbûrg ra vera Koln destpa rayşîyîn kerdî. Nûmayişo ke hetê  Ciwanên Azad ve Jinên Ciwan ên Azad organîze beno yadê kesê ke xoverdayişê xorayverînan de weşîya xo kerdî vinî beno. Gencî dê 3 rojan de 110 kîlometre ray şirê. Gencî dê cayanê zey Dusseldorf, Grevenbroîch ra ravêrê û 3ê aşme de biresê Koln û tewrê Festîvala Kulturî yê Kurd bibê. Komîteyê hadreyîn veng da gencan ke seba serbestîya Ocalanî, seba protestokerdişê êrişanê dewleta tirk yê vera Rojawa û seba wayîrvejyayişê xoverdayişê xoserî tewrê rayşîyîn bibê.   


 ANF/KOLN