12ê Teşrîne de Parîs de êrişê terorî viraziyay û 130 ra jêde mordeman weşiya xo kerdî vindî. Nayî ra Hikumatê Fransa nûmayisanê ekolojîstan, cepkaran, feminîstan, antîkapîtalîstan û nûmayişê bînî yê pêrokîn muxalîfan qedexe kerd.
Parîs de ciwîyayis vindiya
Rîwalê Zîrweyê Îqlîm'î Parîs de ciwîyayis vindiya. Zaf rayî, tren, metro û otobusî didi rojiyo nêguriyenê. Serva konferansî 130 hazar ra zêde polîs û cendermêyî seferber bîyê. Parîs de atmosferê do giran hukum keno. Obama ra, heta Pûtîn, Angela Merkel ra heta Abdulfettah El Sîsî, dewletanê namedarî ra heta, kijkek herkes konferansî de cayê xo gêno. Çiyê balkêş û enteresant no yo ke: Kesê ke tewrê Zîrweyê Îqlîm bî, pêro ebi teyyareyanê teybet amey Fransa. No yew kî paradoksê do gird o. Babedê germayî, gazê ke tesîrê sera danê û terorîzma global babed-tema yê tewr gird ê konferansî yê. Roja sifte yê konferansî de kesê ke qisey kerdî, ser nê babedan vindiyay.
Pûtîn bi Erdogan'î ra nêronişt
Zîrwe de mabêna siyasetmedaran de pêdiyayinî kî virajînê. Jew-Yew têleweameyis mabêna Putîn û Obama de virajiya.
Hurdî lîderan meseleya Surîye û Rojhelate-Mîyanî ser de qesey kerdî û tekilîya Rusya û Turkîya girewtî dest. Hetê bîn ra Pûtîn'î waştena pêhetameyin yê Erdogan'î red kerd. Pûtîn'î ancî-fina ard ziwan ke 'Tirkîya destek dana çeteyanê DAİŞ'. Erdogan bernameyê xo jû-yew roc kerd derg û vizêr bi Barack Obama ra pêdiyayin viraşt.
Jew-Yew rojnamegerê Rûs, o ke Erdogan'î rê persa 'Şima çayê-çima paşt-desteg danê DAİŞ' kerd. Badê na pers, rojnameger hetê pawitoxanê Erdogan'î salon ra ame vetin. Çend qerarê ke Zîrwe ra heta nika veciyayî niya-wina yê:
12 Çelê 2015 de teklîfa besdaranê COP21 û UNICEF wa qerarê ekolojîk, û mudafaya jîyana ekolojîk Beyannama Evrensela Netewê Yewbîyayî de cayê xo gênê.
Onca welatê endusrîyalîzm bîyê 200 (di sey) mîlyar dollar ra jêde ardim danê welatanê feqîran ke tedbîrê ekolojîk. Ebi na hala problêmê demografîk, endustrîyal, û koçbêrîyê, yanê ekolojîk, sosyal û polîtîk ser çara serî munaqasa bîyayî.
Verra COP21 nêrazîbiyenî
La herçiqa ke quwetê kapîtalîstî û welatê pasanîyê ebi na konferansa wazenê planata dîna gewrê bixellesnê zaf rexneyî kî ebi venga berz îfada benê. Roja yewşem Parîs û xêlê sûkan de nûmayişê protestoyî viraziyal. Verra zîrwe tewr berz vengê ekolojistan û tevgerê (lewîyayisanê) alternatîfan vêcîno. Sloganê "Qrizê ekolojîk ebi kapîtalîzma ke bi xo qrîz de ya ra, hal nêbenê". "Yê ke dîna kirêşt no hal kapîtalîst bi xo yê". "Qom û gelanê na dîna gere ser yew çarasekerdena ekolojîka rastkên vindêrê. Omid ebi kapîtalîstê ke musebîbê-mesûlê na qilêr-qertisê girêmedê" berz behê.
Parîs de jû hetî ra qomê dînyayêkê wazenê vengê xo berz kerê, hetê bîn ra muqtedîrê-qûwetê na dîna ebi hezeran polês û cendermeyan qeraran gênê. Meydanê 'Place République' (Meydanê Komarîyê) de nûmayişê da enteresant viraziya. Bi Hezeran merdim û cênikî serba protesto kerdisê terorîzmê DAİŞ û tedbîranê polesan û hikumatê Fransa, solanê xo na meydan de caverdayî. Ebi na nûmayişî şehîdanê xo ardî vîr, heqê mordemîyê û azadiyê seveqnayî. Roja yewşem ra heta na het 100 ra vêşî-jêde kes amey binçimkerdin.
FEYKA ra serva Valls mektûb
Na mabên de FEYKA jû-yew mektubê rusna Serokwezîrê Fransa Manûel Valls û vatenê ey yê 'PKK rêxistina terora' rê nêrazîbiyen damûsna. FEYKA wastena vetişê PKK lîsteyê lewîyayisanê terorîstan ra ard zon.