Komeleya Rojawa wayîr vejyena

Tarîx ra nat dûştê şarê kurdî zilmekê pîl yê sîstemanê serdest esto.  Kurdan dûştê no zilmî şar sere wedanna û destpê îlanê pergalê xorayîrberdişî kerd, la bi hezaran şar koçber bî. Komeleya Rojawa zî no dem ame awankerdiş. Hemserekê Komeleya Rojawa Mustafa Ocaklik projeyê xo ser o zonayişî day.

-Birêz, Mustafa Ocaklık Komeleya Rojawa key ame awankerdiş û xebat û projeyê komele senî aver şonî

Belê, Komeleya Rojawa, Şerê Şengalî demo ke dest pê kerd û koçberî ke hovaneya çeteyê DAIŞî ra remayî û ameyî reyde û bi şerê Kobanê dest pê kerd. No demî koordînasyonêk amebî akerdiş û mîyanê ci de sazîyê heremî ca girewtinî. Demo ke ame dîyîş Rojhelato Mîyanên de şer derg beno û no koordînasyon ganîye awankerdişê komele dî û Komeleya Rojawa ame awankerdiş. Komeleya Rojawa 2014’î ra nika xebatê xo domnena. Demo ke na komel fermî bî, taybetî hetkarîya xo şarê Rojawa, taybetî zî şarê Kobanê ra eşrawit. Kanûnê 2015’î ra nika hetkarîya ma taybetî şarê Kurdistanê Vakurî ra yeno dayîş, çimkî şerê xorayîrberdişî de şarê Kurdistanê Vakurî koçber bîyî. Seba ke Rojawan de pergal xo bi xo îdare keno û no ser hetkarî Rojawa ra nîno eşrawitiş. 

-Nika projeyî ke şima aktîf virazenî, kam î?

Zaf hûmarî de projeyê ma estî û çimkî ma wazenî sazîya ma biba sazîyêka hemdem. Nika binê banê komeleya ma de komîsyonê proje zî esto û endamê no komîsyonî tena seba viraştişê projeyan ser o xebityenî. Armancê no komîsyonî teberê welatî reyde têkilîyan sazkerdiş û welatî de zî mîyanê şaran de pirdêk awankerdiş o. Bi projeyan têkilîyê ma yê sazîyan xurt bî û ma zaf hûmarî de sazî reyde têkilî awan kerd û ma nê sazîyan ra seba hetkarîya şarî, kelmel û silgirê welidyayîşê cenî, ambulans, werdiş-şimitiş û dindanî waşt. Nika seba pêşwazkerdişê heme lazimeyê şarî ser o kampanya ma domyeno. Rîyê şer ser o zî nika ona projeya ma ke mende çin a, no ser zî encax ma eşkenî projeyê rojane bivirazî û lazimeyê şarî zey kelmelê dolaba cemedî û sewbî kelmelî pêşwazîkerdiş ser ma ser piro welatê Ewropa kerd la hema zî ma ra verpersêk nêameyo dayîş.

-Projeyê şima ra welatij/şaro ke havil vînenî şer û mercê înan çîyî? Finak tena şima kesî ke maxdûrê şerî ra hetkarî danî ya zî feqîrbîyayîşî ci bes o? 

Çi heyf ke welatê ma de feqîrî zaf aver şîya û bi destpêka şerî Kurdistan de feqîrî hîna aver şî. Ma raştî bivajî ke ma nêeşkenî her kesî ra hetkarî bidî, ma taybetî kesî ke heremê xorayîrberdişî de zirar dîyî, koç kerdî ya zî banê xo terk nêkerdî ra hetkarî danî. Malbatî ke taxanê xo terk kerdî ra ma lez bi lez hetkarî nêdanî la malbato ke rewşa ci zaf xirabe bibo, ma hetkarî danî. Komeleya ma tena şarê kurdî ra nê, ya zî tena giredayêya yew partîya sîyasî ra nê kesî ke şerî ra zirar dîyî ya zî koç kerdî û ma ra ser piro dayî, ma înan tepa nêeşrawitî. Seba ma kesî ke hetkarî biwazo fikrê ci muhîm nîyo la ganî dişmenîya şaran nêkero. Xora rêziknameyê ma de nuseno; netewe û dînê kesî seba hetkarîgirewtişî, seba ma muhîm nîyo. Seba ma tena muxtacbîyayîşê ci muhîm o. Senî ke kesî ke Şengalî ra ameyî dînê înan zî cîya bî, neteweya înan zî cîya bî. Mîyanê înan de ereb, kurd, xirîstîyan û misliman estbî ma hewna hetkarî da înan. Hopaya Artvînî de erdlerz bî ma Hopa ra zî hetkarî eşrawit. Eyro şarê Kurdistanê Vakurî mîyanê şerî de cuyeno, no ser zî taybetî ma hetkarî şarê Kurdistanê Vakurî ra kenî. 

-Mîyanê aşma Remezanî de zî hetkarîdayîşê şima domyeno û hetanî nika şima xo resnayî çend heb malbatî, şima eşkenî ma ra hûmarêk bidî?   

Hetkarîyêke ma hetanî nika dayî, taybetî mîyanê nê 6 aşmî de nêzdî 80 hezar malbatî yo. Geverî ra bigêrî hetanî Cizîr, Silopî, Hezex, Kerboran, Farqîn û Sûrî destê ma ra çi ameyo, rayêk bibo, di ray bibo, hetta hîrê ray ma hetkarî resnayî înan. Ma çiqas malbatî ra xo resnayî yew bi yew arşîvê ma de nuseno, ma kom nêkerdo la ma zanenî ke ma 80 hezar malbatî ra xo resnayî. Aşma Remezanî de demo dayîşê hetkarî de ma tena nê, sazîyê bîn reyde bi koordînasyonî xebityenî. Ma bir dayî ke na aşma firaz de kesî ke koçber bîyî ra hetkarî biresnî înan û goreyê bawerîya na aşma firaz de bieşkerî rojeya xo bigêrî. Ma zanenî ke têr nêkeno, çimkî qezayî ke şer dest pê kerdî, zaf gird î û finak Nisêbîn zey şaristanêko gird o, Tirkîya de zaf şaristanî ra hîna gird o. Cizîr û Gever rewşa înan ona şaristanêkî gird î û bi sehezaran merdimî cuyenî û koçber bîyî. Nê şaristanan de welatijî ke cuyaynî, mîyanê bi serran kelmel û çikekî kom kerdbî heme rayêkî de şî û no ser zî lazimeyê nê welatijan zaf î. Nê welatijan ra verê Remezanî, mîyanê Remezanî û peynîya Remezanî zî hetkarî ma bidomî. 

-Birêz Ocaklik, ma qiseyê şima ra zî fam kerd ke proje û xebatê şima zaf î. Kesî ke biwazî şima ra hetkarî bidî, projeyê şima de bi zerrî bixebitî se bikerî, kura ra ser piro bidî?

Belê, ma nê xebatê xo ra qal kerd û netîceyê nê xebat û projeyê xo de ma resayî bi hezaran kesî û malbatan. Tena rayverîya sazî bibîynî ma nêeşkîyaynî xo biresnî. Bi şaxê û navenda komele 150 rayverê ma estî la bi hezaran kes bi zerrî ma reyde xebityenî. Nê xebat û projeyî ke ma kerdî, bi sayeya kesî zerrîdar reyde kerdî. Proje û xebatê ma ra zanîngehî ra wendekarî ra û hetta malbatêkî ra pîy, may û heme domanê xo reyde yenî, hewna teberê welatî ra finak zey welatê Almanya, Meksîka, Îspanya, Îngîlistan, Amerîka û welatê dûrî ra  zerrîdar yenî bi rojan depoyê ma de xebityenî. Hewna şaristanê Kurdistanî ra zaf hûmarî de hunermend û gureyê bîn ra kesî yenî ma ra hetkarî danî. Hîna zaf embazê zerrîdarî ra lazimeya ma esto, çimkî newe awankerdişê şaristan û pîştişkerdişê birînî koçberan de encax embazê zerrîdar eşkenî rol kay bikerî. Hema hema heme şaristanan de ya şaxê ma ya zî temsîlkarîyê ma estî. 

Dem demê hetkarîdayîşî yo

-Birêz Ocaklik tewr peynî vatiş ya zî vengdayîşêk şima esto? 

Aşma Remezanî de wa herkes destê xo rono wijdanê xo ser, kesî ke nika vêşanî û mîyanê zehmetî de yî ganî ma înan ra hetkarî bidî. Koordînasyonêk ma saz kerdî û xebatê komkerdişê fitir û zekatî zî keno. Merdimê bawermend, merdimê zerrîdar ganîya ke fitir û zekatê xo şarê heremê xorayîrberdişî reyde bar bikerî. Bi ameyîşê hamnanî welatijê dest pê komkerdişê xeleyî kerdî, demo ke xeleyî kom kerdî wa seba heremê şarê xorayîrberdişî ser o zî bifikrî û parê înan wa cîya bikerî û komeleya ma ra biresnî. 

Bi ameyişê hamnanî Kurdistan de germ zêdîya.  Werd û şimitiş xora ganîyê sifte yî, ziwistanî de şarê şaristanî kerdî, nika hamnanî de dem demê hetkarîdayîşê dewijan o.