Dadgeha Sulhî ya Cezaye ya Agirîye bi îdia mîyanê ci de waştişê ‘Xorayîrberdiş’ esto, derheqê beyannameya weçînayîşî de bira komkerdişî da. Yeno zanayîş ke verîya nika zî tuzikê HDPe de zî no waştiş estbi û no tuzik hetê Dadgeha Berz û Heyetê Berzî ya Weçînayîşî ra ameybi qebulkerdiş. Babete sero Serekê Pêroyîn a ÎHDe Ozturk Turkdogan û Sekreterê Pêroyîn a TÎHVe Metîn Bakkalci qise kerdî.
Dadger kura de bi
Serekê Pêroyîn a ÎHDe Ozturk Turkdogan bira komkerdişê beyannameya weçînayîşî ya HDPe ke hetê Dadgeha Sulhî ya Cezaye ya Agirîye ra ameyo girewtiş bertekê xo mojna û wina verdewam kerd: “Waştişê xoserîye xora tuzikê HDPe de esta. Ger ke cayekî de birakê inasarên yeno girewtiş se aye wext dadgerê ke no bire dano dîyar o ke no welatî de nêcuyeno. Lazim o kesekî bîyaro vîrê o dadgerî ke Tirkîyaye de cuyeno. Tuzikê HDPe hetê Dadgeha Berz û Heyetê Berz a Weçînayîşî ra ameyo qebûlkerdiş.”
Zaf bi kêf têgêrenî
Turkdogan verdewamîya qalîkerdişê xo de ciresna ke dadgerî hetê birgirewtişî de zaf bi kêf têgêrenî û wina vat: “HDP weçînayîşê verên de zî bi no tuzikê ke hetê Dadgeha Berzî ra ameybî qebûlkerdiş, dekewtbî weçînayîşî. Wina aseno ke haya dadgerî nêyî ra çina. Di eslê xo de dadgerî zaf bi kêfî têgêrenî. Beno ke tay kesî înan ra nînan wazenî, labelê nêşkenî wina bikerî. Daraz bi temamî kewto bin kontrolê îqtîdarî. No bire çîyo ke sey skandal o.”
Bakkalci zî dergeyîya qalîkerdişê xo de bal ant ser bertekê şarî û qalîkerdişê xo wina peynî kerd: “Komkerdişê beyannameya weçînayîşî ya HDPe xora çîyo ke kanûnî nîyo û dij hiquqî yo. Lazim o her kes no raştî baş bivîno. No bire dijî exlaq o zî. Ez bawer kena ke do zafaneya Tirkîyaye do hemverî na bire do bivaja bivinder.”
Nêeşkenî mîtîngan bivirazî
Sekreterê pêroyîn a TÎHVe Metîn Bakkalci zî derheqê babetî ciresna ke cayê ke partî nêşkenî fikrê xo bîyarî ziwan, weyra de weçînayîş nîno kerdiş û wina domna: “Hemverê nêy şert û mercê nêdemokratîk û neheqî do şar berteko gird nîşan bido. Şar do bivajo êdî bes o. Nika HDP û CHP nêşkenî Tirkîyaye de mîtîng bivirazî. Nêşkenî xebatê xo yê weçînayîşî bikerî. Hetê nînan de AKP û MHPe mîtîngê xo bi asanî kenî. Xora dîyar bi ke no weçînayîş, awayo adil nêbeno.”
DÎHA/ENQERE