Nê çeteyê ke ti eleqeya înan bi merdimateyî ra nêmendo, senîn eşkîyayî wina asan dekewê heyanî mîyanê Kobanê û şarê ma qetil bikerê, no mijareke cîya yo. Îta de kemaneya Asayîşê Kobanêyî helbet esto. Çimkî, teyna yew ca de nê, hewt-heyşt cayanê cîya yê şaristanî de pêrodayîş virazîya. Çeteyî, hîrê baskan ra dekewtî zerre û şaristanî vila bîyî. Bi no hewa saetan mîyanê şaristanî de fetelîyayî û kam ame verê înanse hemînan kiştî.
Heyanî qewetanê YPGî bêrê û xo biresnê hawara kobanêyîjan çew nêeşkîya vernîya nê hovan bigîro! Eke YPG tayîna erey bimendayê se, çeteyanê DAIŞî Kobanê de yew zindî nêternayê û do Kobanê sernewe ra dagir bikerdayê.
Hewce nêkeno ke ma verpersê nê komkiştenî bigeyrî! Wa qet şik û gumanê ma çinêbo ke, plankerdox û bi ca ardoxê komkiştene Kobanêyî, serekkomarê tirkan o. Her kurdo/a polîtîk û merdimateya bi wijdan nêyî wina zanê. Tayîp Erdogan, çend rey vejîya ekranan ver û vat: “Bedelê ci se beno wa bibo, ma rayîr nêdanî ronayîşê Kurdistano Rojawanî.” O zî zaneno ke nîyetê kurdan dewlet ronayîş nê, riştişê neteweya demokratîk o. Labelê eke mezgê merdimî de faşîzm û dişmentîya kurdan bibose, fekê merdimê ra zî vatenen ana jehrin vejîyenê.
Stratejî, polîtîka û taqtîkanê DAIŞ û Tirkîyayî yew bi yew sey pê yê. Tayîp Erdogan hemverê çîyo se, DAIŞ zî hemverê êy o; armancê Erdoganî çîyose, ê DAIŞî zî o yo!
Vakûro Kurdistanî de, yanî mîyanê Tirkîyayî de, bi desan qampanê DAIŞî estê. Di nê qampan de yenê perwerde kerdiş û erşawiyayênê Rojawanî. Îstîxbaratê ci, lojîstîkê ci, cebilxaneya ci, çeteyê (cîhadîst) ci û sewbîna heme Tirkîya ra şinê. DAIŞ, çi wext do galaya kotî bikero, kotî de do senîn bilebityo û lawazîya dişmenî kotî de yo? Heme çîyê winasin MÎTê tirkan înan rê vana. Belgeyanê nînan ewro çinbo zî do meşte-birro bivejîyê.
Tirkîya DAIŞî çi r ê keno weye? Çend semedê nêyî estê. Nînan ra tewr muhîmî, bê guman, dişmenetîya hemverî kurdan o. Nêwazenê ke kurdî Rojhilatê Mîyanên de azad bicuwiyê. La, se kenê nêkenê nêeşkenê vernîya averaşîyayîşan bigîrî! Averşîyayîşanê polîtîk ê Rojhilatê Mîyanênî, bi hawayoda lezgîn, ma kurdan verba azadî ra beno. Tayîp Erdogan zî nêyî ver ra teqeno. Nêeşkeno raşte raşt bi qewetanê xo yê leşkerî dest bierzo Rojawanî. Zaneno ke eke çîyode winasîn bikero se, Tirkîya de kere kerreyî ser o do nêmanêno.
Nêwazenê bêveng zî bimanê. Tam di no mîyanî de DAIŞî keşîf kerdî. Çîyê ke bi xo nêeşkenê bikerê, bi destê DAIŞî kerdiş.
Komkiştena Kobanê zî perdeya pêyîn ê no kayê Tirkîyayî bi. Tolê ginayîşê Girê Sipîyî ana girotîy. Ê zanitênê do Girê Sipî bikewo. Sewata nêy zî tayîn çeteyan antî Tirkîyayî û venganey vinayî dima ra bi hawayodo şakî nê çeteyan pêynî ra dekerdî mîyanê Kobanê. Nîyetê înan , teyna komkiştiş kerdiş zî nêbi. Waştêne Kobanê zerre ra bifînê war o. No zî plan û projeyê Tirkîyayî bi. Çimkî girotişê Girê Sipî heme polîtîkayanê tirkan qal kerd.
Kemaneya ma îta de dest pê keno. Ma ge-ge kenê xo vîrra ke xelîfeyê DAIŞî Tayîp Erdogan o. Heme cayanê Tirkîyayî bi çeteyanê DAIŞijan pirrkerde yo. Ganî ma tewr vêşî sîndorê Tirkîya ser o de aya bîme. Çimkî; ma bi DAIŞî ra nê, dewleta tirkan ra şer kenîme...
Xelîfeyê limite Erdogan o
Tayînî vanê ke “Dewleta tirk û Tayîp Erdogan, çi ra DAIŞî ra nêrehet nêbîyêne, YPGî ra çir a nêrehet benê?” No vaten zî min rê tayîn safane yeno. DAIŞ, xora rayvistina Tayîp Erdoganî yo. Eke hetkarîya dewleta tirk nêbîyayê, DAIŞ nêeşkayêne hentay gird bibo. Bi no riwal ra, merdim eşkeno vajo ke xelîfeya raşt ê DAIŞî Tayîp Erdogan, emîrê DAIŞî yê nimite zî Hakan Fîdan o. Helbet destê ma de çew delîlê nê angaştî çinyo! La sewata famkerdişî tayîn çîyan rî delîl hewce nêkeno! No dewlet bol weş zano do gureyê xo senîn bikero? Teşkîlata Mahsûsa ra naşt, nêzdîyê se serro ke, bi gureyanê ana karîyan ra mujil benê. Sewata nêyî zî karê xo bol hostane virazênê! Pêynîya xo de yew delîlo şênber nêveradanê. Bi ewnîyayîşeke seranser, ti nêeşkenê hetkarîya Tirkîyayî ke dano DAIŞî îspat bikerê; la eke merdim bi çimeyeke xorîn biewnose yeno vînayîş ke, ka senîn heme çalakîyanê DAIŞî goreyê stratejîya tirkan avera şino?