Azayê  Konseyê Rayverînê KCK Sabrî Ok derheqê babedê ke rojdem de yê de ajansê xeberan ê ANF rê  qal kerd.

Ok hêver komkiştenê Parîs ê 13’ê Mijdar  ser vindert û eleqa  ant piyakerdenê AKP, çeteyanê DAIŞ, El Nusra û sey înan ser û vat: Çeteyanê  DAIŞ ciya-ciya welatanê Awrupa ra, Tirkiyê ser ra şî Suriye û Iraq. Nê çeteyê faşîstî inkê zî eynî raye ra Tirkiyê ser ra, şinî welatanê Awrupa û komkiştinan virazenî.

Ok 9’ê Çele ya 2013 de komkiştenê 3 ceniyanê şoreşger ê Kurd arde vîrî û qalkerdişê xo wina ramit: “Cipersayişanê na komkiştenî de, piyerê rêçan dewletê AKP miyetene ra. Dimê nay, komkiştenê Charlie Hebdo virazya. Nê komkiştenan ra yo zî, yo bîn ra ciya nêbî. Piyerin de gişta hikumetê AKP esta. Ez bawer kena ke, dewlet û şarê  Fransa zî na raştî zaf hol zanî.”


Pêro şarê ma wa ageyrê Şengal

Azayê Konseyê Rayverînê KCK Sabrî Ok’î mulaqatî de herzewbîn cewab da persanê derheqê xelesnayişê Şengal û Hol de zî û ûna vat: “Çeteyanê DAIŞ 3”ê Tebaxê 2014 de, Şengal de ver çimanê dinya de, verra şarê Ezidî komkiştenê se-serran viraşt. Eke qeflê YPG pê lejkerdena korîdor nêakerdiya û nêresayene Şengal, bi des hezaran kesî bîn zî do qetil biyaybî. Verva çeteyanê DAIŞ tekoşîn bêbinate ramit. HPG, PDK ra waştiyene ke semedê serbestkerdenê Şengal’î quwetane xo yo bikerî la PDK qowil nêkerd. Nînan rê şarê Şengal û piyerê eleqadarî şahîdî.

Ok veng da şarê Ezîdî zî û vat: Şengal biya serbest, ma veng danê piyerê şarê ma Ezîdî. Şarê ma yê ke, şî Rojawa, Bakurê Kurdistan û Awrupa, gerek ageyrê erdê dadî xo, Şengala bimbarek. Şengal hinda bêpawitene niya.


“Nika Rakka û Cerablus de wextê hemle newî yo”

Derheqê ravêrşiyînê Hol, Rakka “u Cerablûs de zî Sabrî Ok’î niya qisey kerd: YPG-YPJ îradê  DAIŞ şikit û quwetê ey kerde kêm. Serkewtenê Hol, quwetanê ke piya verva DAIŞ lej kerd, yê înano.  Gorê ma; nika Rakka û Cerablus de, wextê jû hemle ya newî yo. Rûsya û quwetanê koalîsyon, hemle ya winayîn rê akerdeyî. Astengî tênya dewleta AKP ya. AKP hama polîtîkayê xo ê dişmenî verva Kurdan ramena. Pê na polîtîka komkiştenê Ankara, Amed, Pîrsûs û Parîs virazyayî.


“Şexsê Farqîn de şarê Kurdistan’î serkewtî”

Azayê Konseyê Rayverînê KCK Sabrî Ok’î serkewtenê Farqîn’î zî vist vîr û vat: Şengal û Hol’ ra piya serkewtenê hîrên zî yê şarê Farqîn’ o. Farqîn  qerardarînê xo serva-semedê îdarê xoser miyet ra û faşizmê AKP na ruwe, îsyanê xo resna serkewtene. Farqîn hetê dewlet ra veşa, rijiya la xoverdayişê şarî kewtê ser. Şexsê Farqîn’î de şarê Kurdistan qezenc kerd. 


 NAVENDA XEBERAN