Ewro, serragêrayîya 19’ine ya Komploya Mîyannetewî ya verva Rayverê Şarê Kurdî Abdûllah Ocalanî ya. Komploye ser ra 19 serrîy derbas bîy. Tarîxê Rochelatê Mîyanênî û bi taybetî yê Şarê Kurdî de komployê winayinîy zaf ê. Verva şar û serekanê Şarê Kurdî, tarîx de xeylê komploy ameyê plankerdiş û pêkardiş. La nînan ra tu komployêke bi qasê komploya 9’ê Citmenga 1998’ine, bihesab, verhîra nêbî û goreyê encamanê xo zî tarîxê Şarê Kurdî û Rochelatê Mîyanênî de, nêbî sebebê vurîyayiş, averkewtişan.
Sebebê na komplo zafîy bê zî, têkîyişê pergala Sovyete, hewceyîya pergalêka newîye yê dinya û xirsê xo bi awayêko lezîn hîrakerdiş û vilakerdişê sermîyanê gerdûnî , esasê binkeyîn ê.
Verîya têkşîyişê pergala Sovyete dinyayêka diserreyîye este bî. Heme persgiray û qewemîyayişê civatî û çînî êy şaranê dinya, mîyanê na pergala diserreyîye de ameyê nîqaşkerdiş û hetan bi goreyê na diserreyîye ca û bera xo kifş kerde.
Têkşîyişê Sosyalîzmê Reelî û vilabîyişê Pergala Sovyete, bîy sebebê venganîyêka girde. Sosyalîzmî vînî kerdbi û pargala kapîtalîste bi ser kewtebî. Gere êdî hereket û serrewedartişanê ke xo arznayêne ra felsefeya Marxîste, bi temamî biamebêne tasfîyekerdiş.
Badê têkşîyişê pergala diserreyîye, hewceyî bi Pergalêka Newîye yê Dinya este bî. Na zî gere hetê Kapîtalîzmê Gerdûnî ra biamebêne awankerdiş. Sermîyano gerdûnî ke heta a roce nêşikayêne bi awayêko rihet têbigeyro, gere êdî bi awayêko lez hemeyê dinya de vila bibayêne.
Reyna bi têkşîyişê Pergala Sovyete, nexşeya dinya de vûryayişîy pêk amey. Ewrûpa de netewdewletî perçe bîy. Dewletêy ke pergala Sovyete de bîy, pergala Ewropa –Kapîtalîzmî de cayê xo girewt. Na rewşe ro hemeyê dinya tesîr kerd. Nameyê na rewşe zî Pergala Newîye ya Dinya bî. Gere Rochelatê Mîyanênî zî naye ra barra xo bigirotayêne.
Gere ferasetê netewdewletî yê Rochelato Mîyanên de zî goreyê waştekanê pergala newîye tay vurîyayişê, biamebêne viraştene. Îraq amebi helkerdiş. La Sûrîya, Tirkîya, Îran û dewletêy bînîy êy kendawe, nêbîyê ke bi heman pergale dewam bikerê.
Têgêrayişê Azadîya Şarê Kurdî teberê nêy pêm/mawanê Pergala Newîye yê Dinya de bî û zore dayêne Tirkîyaya ke Rochelato Mîyanên de zê notirwana Kapîtalîzmê gerdûnî, amebî wezîfedarkerdiş. Pergala newîye seba çinêkerdişê Têgêrayişê Azadîya Şarê Kurdî her awayî, hetkarîya Dewleta Tirke kerdê. Verva nêy heme hetkarîyan zî Hereketê Azadîye roc bi roce, gam bi game aver şîyê.
Verva naye hêzê hegemonîkî bi xo kewtî dewreye û planêy kahnî êy tarîxî vistîy pratîk. Na ra ver zî xeylê doran amebi cerebnayiş ke Rayverê Şarê Kurdî amey dîlgirotiş û çinêkerdiş, persgira zî bixo çareser bîyêne. Xora înanê ke komplo de ca girewtbi, bi vatişê “Do di şeş mengîy de Têgêrayişê Azadîye têk şêro” nîyetê xo eşkera kerdbi.
Belkî yewîn dore hesabê hêzanê dîzaynkeran şexsê Rayver Ocalanî û hereketo ke bi felsefeya ey amebi rayvistinkerdişî de, pêk nîyamebi. Hesabê 6 menganê dîzaynkeran ser ra 19 serîy derbas bîy. Ewro hereket û felsefeya Rayver Apoyî, heme wextan bihêzêrî yo û Rochelato Mîyanên de hêza rojdem-dîyarker o. Hêzanê ke komplo de ca girewtbi, ewro seba ke bişikê Rochelato Mîyanên de lingan sero vinderê û menfîetanê xo bipawê, bi hereketê Apoîstî reyde, mîyanê hemkarîye de yê.
Şarê Kurdî yewîn dore qedera xo ya sîya û bêyewme ya tarîxî, bi felsefe û paradîgmaya Rayver Apoyî, têk berde. Ewro wina ayseno ke tenê qedera Şarê Kurdî nê, ya heme şaranê Rojhelatê Mîyanêzî do bi na paradîgma, bêro vûrnayiş. Tarîxê Rojhelatê Mîyanênî de yewîn dore komplogerîy têk şîy.
Her çende tay hêzîy wazenê komploye bidê domnayişî zî, la paradîgmaya Rayver Ocalanî zerrîye û mezgê şaran de ca girewto û vaş kokê xo sero, newe ra hêşîn bîyo.