Konferansa Çand û Hunerê ya NÇM’ê di 22-23’yê de cotmehê de li Amedê bi dirûşma “Huner lêgerîna Heqîqetê ye” pêk hat. Ji gelek sazî û dezgehên çandê û kesên hunermend jî di nav de nêzî 120 kes beşdarî konferansa çandê bûn. Di encamnameya konferansê de hate diyarkirin ku modernîteya kapîtalîst ji gelek aliyên xwe ve ketiye nava krîzeke kûr û ev krîz ji krîza aborî-ekonomîk wêdetir, krîzeke pergalî, birdozî û çandî ye. Encamnameya konferansê  wiha berdewam dike: “Girêdayî pergala giştî ya li Rojhilata Navîn jî xeta netewe-dewletê ketiye pêvajoya hilweşîne. Ji bo ku xeta alternatîf a gelan li hemberî van pergalan bi ser nekeve hêzên desthilatdar diyar e ku plan û stratejiyên nû diceribînin.” 


Pergala alternatîf 

Di encamnameyê de hate diyarkirin ku pêwîstiyeke bi pergaleke alternatîf heye û ji ber vê yekê jî berxwedaneke bi rêxistinî, birdozî û exlaqî heye. Her wiha encamnameyê de hate gotin ku berxwedana azadiyê ya gelê kurd nêzî 40 sal in tê rêvebirin û gihîştiye asteke ku bikaribe pergaleke alternatîf a jiyana azad ava bike. Encamname wiha didome: “Hêzên dagirker ên desthilatdar ji bo ku kurd negihîjin statuyekî û pergalek alternatîf ava nekin di serî de li hemberî Rêberê Gelê
Kurd û Tevgera Azadiyê û gelê kurd şerekî berfireh dane destpêkirin.” 



Rexnedayîna rêxistinî  

Di encamnameyê de hate destnîşankirin ku operasyonên qirkirina siyasî, êrîşên li hemberî gerîla, şerê taybet û psîkolojîk polîtîkayên qirkirina çandî vê rastiyê diyar dike. Di encamnameya konferansê de hate gotin ku, konferans ji gelek aliyan de pirgirêkên rêxistinî, hunerî û felsefîk nîqaş kiriye û her wiha di 20’emîn salvegera sazîbûna çand û hunerê ya qada bakur de hatiye lidarxistin. Encamname wiha didome: “Tevî vê rastiyê, wekî tevgera çand û hunerê di vê sala çûyî de me rola xwe ya pêşengtiyê ya rêxistinî û hunerî têr û tijî pêk neanî. Di aliyê rêxistinî de, em qels man. Ev qelsî bû sedem ku desthilatdar û dagirkeran êrîşên xwe yên li hemberî nirxên me yên bi hezaran salan kûrtir bikin.” Encamnameyê de tê diyarkirin ku di aliyê hunerî de û xebatên çandî de dubarebûn heye û ji ber vê rewşa dubarekirinê, pêşketin kêm maye. Her wekî din hate bilêvkirin ku ji bo ev rewş were derbaskirin rêxistina çandê û hunermend li çavkaniya hunera kurd vegerine rastiya dîroka wê bizanibin û civaka kurd wekî cewhera hunerê bibînin. 


Rola jinê û heqîqet 


Encamnameya konseransê ku balê dikişîne ser gelek xalên girîng wiha berdewam kir: “Konferansa me, di xebatên çand û hunerî de li ser rola jinê ya pêşeng sekinî,di xebatên çand û hunerê de jin wekî çavkaniya hemû nirxên çandî,hunerî,estetîkî hate binavkirin û pêwîstî bi xurtkirina berhem,xebat û berfirehkirina rêxistinbûyînê hate dîtîn.” Hate diyar kirin ku yek ji perspektîfa konferansê ew e ku lêgerîna heqîqetê ya di hunerê de were kûrkirin û bilindkirina berxwedana çandî, ji bo pêşxistina pergala xweseriyê û ji bo avakirina sistema moderniteya demokratîk pêdiviya xurtkirina sazîbûyîna çandî ye.

DÎHA/AMED



Xala Xweseriya Demokratîk



Di encamnameyê de hate destnîşan kirin ku Xweseriya Demokratîk wekî statuya azadiya Kurdistanê ye û ji bo avakirina vê pergalê rola tevgera çandê, wekî roleke sereke bilîze. Di encamnameyê de hate diyar kirin ku danûstandinên çandî yên neteweya kurd divê were xurtkirin û bi giştî ji bo azadi, tenduristî û ewlehiya Rêberê Gelê Kurd Abdullah Ocalan xwe wekî berpirsyar dît. Encamname wiha bi dawî dibe: “Konferansa me, bi ruhê xeta şehîdan hate rêvebirin û şehîdên şerê şoreşgerî yên gel Rustem Cûdî, Alîşêr Koçgîrî, Çîçek Botan, Baz Mordem hwd wekî sedema hebûna xwe binav kir” Di dawiya encamnameyê de ji bo kesên ku di erdhêja Wanê de jiyana xwe ji dest da sersaxî hate xwestin.