Roja 2. yê konferansî de vizêr panelê ‘Problemê azadî yê cenîyan’ û panelê ‘Meselebîyena ekonomî’ amey qiseykerden. Panelê ‘Problemê azadî yê cenîyan’ ke moderatorîya ci akademîsyena Filîstînij û aktivîsta cenîyan Zehra Ahmed Mûhammed kerd de hayr ancîya Rojhelatê Mîyanî de meseleyê cenîyan û emegê Rayverê Şarê Kurd Abdullah Ocalanî yê serva azadîya cenîyan ser. Aktivîsta cenîyan Mûhammed bi selamkerdişê Ocalanî destpa qiseyanê xo kerd.
Mûhammed vist vîrî ke a rêxistinekê cenîyan yê Filîstîn ra yena û wina va: “Derheqê Filîstîn de vatişê muhîm yê Ocalanî estê, nayî ra ez kêfweşa ke tewrê konferansekê winayîn bîya.
Camêrdî nêwazenê cenî serkewtî bê
Hiqûqzan û pawitoxa heqanê cenîyan û însanan Sirûd Ahmed ke panelî de qisey kerd hayr ant tesîrê meseleyê cenîyan yê qada civakî ser. Ahmed da zonayen ke Rojawa de cenî xêlê ravey şî û va ganî cenîyê Başûr zî cenîyanê Rojawa xo rê nimûne bigîrê. Ahmed vist vîrî ke cenî bi vînayişê dînî girotîyenê bin zextî û va: “Qanûnê Başûrê Kurdistan zî pirzewacî manî nêkenê, cenîyan kenê hepsê keye, ser bedenê cenîyan bazarî rê destûr danê.” Ahmed aşkere kerd ke camêrdî nêwazenê ke cenî serkewtî bê.
‘Rolê Ocalanî dîyarde yo’
Azaya Koordînasyonê KJA Sara Aktaş zî panel de qisey kerd û vist vîrî ke zihnîyeto ke camêrdî gêno merkezê fikrî cenî zey hêmanê fikrî nêvîneno. Aktaş aşkere kerd ke îxtidara camêrdan ke cenî çinî hesibnena esta û va na îxtidar ser redê bîyayişê cenîyan de înşa bîya. Aktaş vejyayişê cenîya kurd ya tekoşer de hayr ant rolê Ocalanî ser û da zonayen ke birêz Ocalan vano wexto ke cenî bîro terîfkerden, camêrd êşkîyeno bîro terîfkerden.
‘Şoreşê cenîyan omid dano’
Azaya Koordînasyonê Kongra Star Leyla Reşîd Kahraman ke Rojawa ra tewrê panelî bî vist vîrî ke rejîmê Baas panc reynî qanûnî vetî û va la heqê cenîyan ti wext nêbi. Kahraman ard ziwan ke na rewşî îradeyê cenîyan şikit û wina va: “Renga cenîyan ra behskerdiş mimkûn nîyo. Rejîmê Baasî de cenî nêşkenê xo rêxistin bikerê, nêşkenê sîyasetî de ca bigîrê, tenya keyeyê xo de yê. Dûştê cenîyan de şîdet, tecawiz û îşkence estbî.”
Leyla Reşîd Kahraman aşkere kerd ke şoreşo ke cenîyanê kurd Rojawa de viraşt bi omidê cenîyanê dinya û weşîya azad ya newî.
Ekonomîya komunal
Konferans bi panelê 2. ‘Meselebîyena ekonomî’ dewam kerd. No panelî de zî polîtîkayê ekonomî yê Rojhelatê Mîyanî amey qisey kerden. Partîya Komunîst ê Hîndîstan ra Sangaj Sîngbvî ke moderatorîya panelî kerd hewcedarîyê ronayişê civakekê newî û ekonomîya newi ard ziwan. Wezîfedarê perwerde yê Zangehê Silêmanî ra Yasîn Alî ke panelî de qisey kerd zî hayr ant ekonomîya Rojhelatê Mîyanî û Kurdistan ser. Alî vist vîrî ke tekoşînê tewr gird yê însanan babedê ekonomî ke açarnîyayê zey problem de ameyo dayen. Yasîn Alî aşkere kerd ke na problema ke bi destê însanan bîya, çarekerdişê ci zî destê însanan de ya.
Azaya Komîsyonê Ekonomî yê KJA Necla Bakir zî hayr ant ekonomî de rolê cenîyan ser û da zonayen ke ê komun û kooperatîfan esas gênê. Bakir vist vîrî ke netewa demokratîk û modernîteya demokratîk ser ekonomîya komun de înşa bena û aşkere kerd ke ganî na ekonomî ra wayîr bivejnîyo.
ROJNEWS/SILÊMANÎ