MÛRADA KENDA ANHA / QAMIŞLO Hemsereka Kongreya Neteweyîya Kurdistanî (KNK) Nîlufer Koçe derheqê îzehetê Başûrê Kurdistanî ke dagîrkerîya dewleta tirkî ser o kerdbî de qisey kerde û dîyar kerde ke yê ke dîyar kenî ke hêrişî tena vera PKKyî de benî, xo bi xo xapênenî. Koçe daye zanayene ke dewleta tirkî serranê 90î ra nata bi hawayo cîya cîya hêrişê Başûrê Kurdistanî kena û hewl dana Başûrî dagîr bikera û wina domnaye: “Dewleta tirkî kurdan hakimîya xo ya herême de kurdan xo rê asteng vînenî. Nê hêrişî Şorişê Rojawanî ra dima hîna zêde bîyî. Dewleta tirkî ke heme hedefê xo seba pawitişê sîstemê faşîstî kerdî û kurdan xo rê serdişmen vînena û wazena ke kurdî wa nêbî wayîrê statuyêk.” Koçe dewamê qiseykerdişê xo de wina va: “Dewleta tirkî serranê 90î ra nata 22 qerargehî Başûr de awan kerdî û wazena hûmara nê qerargehan bivejo 33. Vera nêyî de Nêçîrvan Barzanîyî dewleta tirkî pîroz kerd û PKK sey dagîrkerî nîşan daye. Îzehet û zîyaretê Barzanîyî tena feydeyê ci seba Erdoganî bîyo. Barzanî herinda ke piştîya xo bido şarê xo, dano dişmenanê xo.” Reaksîyonêko wişk lazim o Koçe peynîya qiseykerdişê xo de va ‘dewleta Îraqî heta nika qet bi hawayo baş vera hêrişê dagîrkerîye yê dewleta tirkî de nêvindeto. Ganî Meclîs û dewleta Îraqî reaksîyonêko wişk nîşan bido. Yê ke îdîa kenî ke hêrişê dagîrkerîye tena vera PKKyî de benî, şaşîyêka girde kenî. Nameyê nê sîyasetî sîyasetê antîkurdî yo. Hêrişê ke vera Qendîlî de benî, meseleyêkê neteweyî yo. Çimkî PKKyî xizmetê şarê kurdî kerdo û dewleta tirkî zî wazena nê şarî çinî bikera. Hedefê nê hêrişan tena Qendîl nîyo, heme Kurdistan o.”