Endamê Desteya HDPî Onen vat ke HDP do goreyê waştişê şarî nexşereyêka newe dîyar biko, ê demo newe de taybetî lomedayişî ser o bivinderî û tifaqa netewî, persgirikê Kurd û ziwanê Kurd ser o zî têkoşîn bidê.
LÊL AMED / ENQERE
HDP kongreya xo ya heybet a 4’ine viraşt, kongre ra nezdî 30 hezar merdim beşdar bîyê. Kongre de mesajê sey bî şayîya demokrasî û HDP êdî alternatîfê îqtîdarî yo, heme şarê bindestî binê banê HDPî bîyê yew û Tirkîya de adresê averberdişê demokrasîye HDP yo ameyî dayiş. Endamê Desteya HDPî Omer Onen zî plan û projeyê xo yê newe ser o qise kerd.
Bajar bi bajar konferans
Endamê Desteya HDPî Omer Onen vat ke kongre de vejîya ver ke HDP adresê çareserîya persgirikê Rojhelatê Mîyanên û Tirkîyaye yo û wina vat: “Nika Tirkîya de tewro qewetir muxalef keno HDP yo, HDP muxalefetîya xo ya qewetir, Weçînayişê Xocayî de bi stratejîya xo nîşan kerd. Êdî şar omid keno ke HDP vertaxê îqtîdarî yo. Na kongre de dîyar bi ke HDP senî heme probleman ra bibo verpers û ameyoxêko azad senî awan biko, no ser zî qewetêko bi xurt şert bî.”
Zaf embazê girewtê binçiman
Endamê Desteya HDPî Onen aşkera kerd ke çi heyfo ke nika çew Tirkîya de nêeşkeno behsê azadî, aştî, huquq û demokrasi biko, persgirikê ciwan û cenî aver şono û wina vat: “Vera heme persgirikan çareserî newebîyayiş bî. Ma seba xurtbîyayişê kongre ser o, bajar bi bajar konferans viraşt, persgirikê vejîyayî ser o kongreyêk bi xurt ganî biameynî viraştiş. Na kongre de şert bi ke HDP rayberîyêka demokratîk awan biko û vera îqtîdarê AKPî muxalefetêk biko.”
Onen bi coş û kelecan vîyartişê kongre ra bal ant û wina dewam kerd: “Kongreya HDPî bi coş vîyart, seba astengî zaf teda kerdî û zaf embazê ma binçiman girewtê. Na kongre de heme rengî ra şar estbî, Colemêrgî ra hetanî Edîrne, Tekîrdagî ra hetanî Qersî heme bajar û qezayê Tirkîya ra şar beşdar bîyê. Na kongre de taybetî ciwanan bi reng û têkoşînê xo ca girewtê.”
Mesajê Leyla Xalide
Onen tewro peynî vat ke kongre mesajê muhîm vejyayî û wina qedîna: “Taybetî Ewropa, Başûr û Rojawanî ra beşdarî û mesajê xurt ameyî dayiş. Leyla Xalid bi mejaxê xo reng da kongreya HDPî. Partîyêka qewetê xo şarê xo ra bigo do serkewt bibo. HDP do goreyê waştişê şarî nexşereyêka newe awan biko, ma demo newe de taybetî lomedayişî ser o bivinderî. Taybetî tifaqa netewî, persgirikê Kurd û ziwanê Kurd ser o ma têkoşîn bidê. Tirkîya do ver bi demokratîkbîyayişî şert o şîro, hedefê rayberîya demokratîke ya HDPî zî no yo.”