Kongreya Neteweyî êdî mecbûrî ya

Hemsereka TEV-DEMî Asya Abdullahe meqaleya xo ya ke rojnameyê Buyerî ke Vakurê Sûrîye de weşanîyeno de derheqê Yewîya Neteweyî ya Kurdî û sîyasetê herême ser o nuşto.

Asya Abdullahe meqaleya xo de bale anto îttîfaqo ke hêzanê herême dişmenîya kurdan ser o awan kerdo ser û wina vato: “No îttîfaq raştîya xo de tesîrê têkoşînê ma nîşan dano. Cok ra seba vernîgirewtişê îttîfaqanê winasîyan û wedarnayîşê hêrişan ganî hêzê kurdan yewîya xo ya neteweyî awan bikerî.”

Asya Abdullahe va ‘çareserîya problemê kurdî bedilîyayîşê herême ser o do tesîrêko gird bido’ û wina domnaye: “Kurdî mecbûr î yewîya xo ya neteweyî awan bikerî. Nêyî seba azadîya xo ganî bikerî. Kongreya Neteweyî ya Kurdan do heq û azadîyanê kurdan bigîro bin temînatî. Kurdî seba ke yewîya xo awan nêkerdî, hertim raştê hêrişan ameyî. Cok ra ewro heme warê ma açarnayî warê şerî. Labelê seba şiknayîşê hêrişan û pêardişê azadîye ganî kurdî yewîya xo awan bikerî. Wa heme hêzê kurdan seba Kongreya Neteweyî ya Kurdan çi keweno milê înan ser, bikerî.”

ANHA/QAMIŞLO