Endamê Konseyê Îdarekarî yê KCKyî Riza Altunî rojnameyê hewteyî yê Awane rê qisey kerd û qiseykerdişê xo de qala muhîmîya viraştişê Kongreya Neteweyî ya Kurdî kerd.
Endamê Konseyê Îdarekarî yê KCKyî Altunî dîyar kerd ke Kongreya Neteweyî ya Kurdî projeyêko muhîm a û wina va: “Tevgerê PKKyî destpêk ra nata wazeno kongreyêka neteweyî ya kurdî bêro viraştiş. Seba ma na rojevêka newe nîya, verê ra seba kurdan lazimîyêka esasî ya.”
Altunî va ‘wexto ke merdim na rewşa parçebeye ya mîyanê kurdan ra ewnîyeno, vîneno ke problemo tewr gird yewîya kurdan o’ û wina dewam kerd: “Heta ke no problem nêro çareserkerdiş, mumkin nîyo ke kurdî serbikewî. Merdim şêno bi hawayo kûr şîrove bikero. Kurdistan mîyanê çar dewletanê dagîrkeran de ameyo parçekerdiş û kurdî zî mezg de hetê hêzanê dagîrkeran ra roje bi roje yenî parçekerdiş. Kurdî her roje yenî parçekerdiş û çinîkerdiş. Çareserîya nêyî vernîgirewtişê parçebîyayîşî ya.”
Kongreya Neteweyî lazimîyêka muhîme ya
Altunî persê ‘tîya de çîyo ke lazim o bêro kerdiş çî yo?’ kerd û wina va: “Ganî kurdî bişênbî xo îfade bikerî. Ger ma bişênbî xo îfade bikerî, o wext ma do bişênbî problem zî çareser bikerî. Seba nêyî lazimî bi çi esta? Lazimî bi Kongreya Yewîya Neteweyî ya Kurdî esta û Kongreya Yewîya Neteweyî ya Kurdî lazimîyêka stratejîke ya. Cok ra ganî heme partîyê kurd na babete de sey yewbînan bifikiryî. Çiqas zehmet beno wa bibo, çiqas problem beno wa bibo, ganî ma bi her hawayî fedakarîye bikerî û problem çareser bikerî. No het de lazimî bi perspektîfêka yewîya neteweyî esta. Heta yewîye nêba, ewleyîya ti kesî çin a. KNKyî referandûm ra ver xeylê reyan na babete ard rojeve, labelê pê nêame. Eke no bibîyêne, do îdareyêko winasî awan bibîyêne û gamî biameyêne eştiş û parçebîyayîş biameyêne wedarnayîş.”
Altunî qiseykerdişê xo de munaqeşeyê ke referandûmî ra ver ameyênê kerdiş kerd û wina va: “Hetêk de xebatê seba kongreya neteweyî estbî, heto bîn de zî xebatê seba referandûmî. Çîyo şaş çi bî? Înan vatêne qey bê yewîya neteweyî do îradeya şarî bişênbî bivejî orte. Gelo çîyêko winasî mumkin bî? Wexto ke merdim rewşa tarîxî, sîyasî û komelkî ya kurdan ra ewnîyeno, vîneno ke nika hîna zaf kongre ameye sabotekerdiş. Herinda kongreya neteweyî de referandûmê xoserbîyayîşî vetî aver. Ma hişyar kerd, ma va no şaş o. Ganî ma şert û mercan amade bikerî ke na bierzî rojeve. Şerto esasî zî yewîye ya. Ancax o wext merdim eşkeno referandûm zî bivirazo, xoserîye zî îlan bikero.”
Beşdarbîyayîşê kongre berpirsîyarîyêka girde yo
Altunî peynîya qiseykerdişê xo de wina va: “Gelo badê na rewşa ke qewimîyaye zî ma do lazimîya yewîya neteweyî fam nêkerî? Yanî eke ma fam nêkerî ke lazimîya yewîya neteweyî çîyêko heyatî yo, o wext do dersê muhîmî zî nêrî vetiş. No zî tena zirar nêdano wayîrê nê sîyasetî. No zirar dano têkoşînê azadî yê heme Kurdistanî. Zirar dano heme komelî. Goreyê ma beşdarbîyayîşê kongreya neteweyî wezîfe û berpirsîyarîyêka girde ya.”
ANF/BRUKSEL