Konsept û polîtîkaya şerî

Weçînayîşê 7ê Hezîrane ra pey dewleta Tirkîya adeta yew şero bêqeyde û qirêjin da destpêkerdiş. Hukmatê AKP, Serekkomar Tayyîp Erdogan, ordû û mehkemey, sazîy û dezgey, çapemenî û medyaya Tirkîya, bi taybetî Meclîs û Partîyê Sîstemî (pergalî), goreyê hewceyeya (hewcîtîya) cengî organîze bîyê. Dewleta Tirkîya, adeta aqilê xo vînî (vîndî) kerdo. Sankî mezgê xo, pey non û penîr werdo. Se kamyona ke firen nêtewşena û verbê serecêr şona. Û çi heyf ke şoforê na kamyone zî qrîzê psikolojîyî verneno. Na kamyone kura de teqle fîynena û kurade qelibîna bellî nîyo. La ina (wina) hewa şêro yew qezayo pîl beno. 

Goreyê şertanê herbî organîze bî

Bi talîmat û waştişê Serekkomar Recep Tayyîp Erdoganî, Dewleta Tirkîya; cor ra hetan çêr, goreyê şertanê şerî organîze bîya. Bi temam polîtîkaya şêrî û şîdetî esas gêna. Dewleta Tirkîya semedo ke kurdî wayîrê yew statuyî nêbî, poltîka û dîplomasîyê xo yê mîyanneteweyî zî goreyê konseptê şerî pratîze kenê. Dewleta Tirkîya yew qrîzê sîyasîy ra vêrena. Na polîtîka de, no konseptê şerî de ameyoxê şaranê Tirkîya çin o. Min şinikeya xo de, pirtûkêko ke nameyê ey Delî Dûmrol bi wend. Delî Dûmrolî, yew dereyo bêawe ser o yew pird viraştbi. Delî Dûmrol, nê pirdê ser o vendertbi. Kam ke nê rayîr de bişîynî, ganî hem nê pirdî ser ra bivêrtnî û hem zî akçeyî bidaynî Delî Dûmrolî. Şeyoxî ke nê pirdî ser ra nêvêrtnê, Delî Dûmrolî ra kutiş werdnî. Polîtîkata dewleta Tirkîya, polîtîkaya Delî Dûmrolî ya. No dewr de, na polîtîka hinê qebul nêbena. Tirkîya de, dinya de kam/e ke şima rexne biko, şima ey/a se dişmen îlan ken kenê. Çi heyf ke no qismê komelî rew-rew nêbedilîno. 

Polîtîkayê sentezê tirk-îslamî

Hetan yew seserre yan bedilîno, yan nêbedilîno. No qismê komelî verî raya xo daya Partîya Demokrate (DP), dima daya Partîya Edaletî (AP), Dima daya Selameta Mîllî (MSP), Partîya Partîya Anavatanî (AP), Partîya Dogrû Yolî (DYP), Tewr dima zî daya AKPyî. Ma wexto ke nê partîyan ra hewnênê, hima-hima hemeyê înan partîyê mûhafazakar î. Nê heme partîyan, polîtîkaya sentezê tirk-îslamî esas girewta. Nika ra pey zî se ra 40ê komelî raya xo dano nê tewir partîyan. Yanî Tirkîya de se serran dima yan demokrasî înşa beno yan nêbeno. Çi heyf no yew realîteyê Tirkîya yo.Hukmat û tayê partîyê sîyasî, broqrat û yew zumre, cehalet, xizaney û dîndareya no qismê komelî sûîstîmal kenê. Cehalet û nizaneya komelî ra miqate benê, xo rê rantê sîyasî û ekonomîyî tedarik kenê. No zumreyê serdestan; lajan û nizdîyanê xo ray nêkenê leşkerîye. Çunku gan û gonîya înan qîymetin a. No welat de nizan û xizan zaf o, bi çend qalanê dînî û çend qalanê nîjadperestey adeta mezgê nê xizanan û nizanan teslîm gênê. Kurdan zî terorîst, bêdîn, zerduşt, barkerdox îlan kenê. Serdestê na dewlete, mîyanê komelî de toximê kîn û nefretî ramenê. Xizanan û nizanan ra adeta yew cinawir peyda kenê û ray kenê ceng. Dewleta Tirkîya, nizaney, nîjadperestey û dîndareya komelî ra sûîstîmal kenê û raykena kurdan ser. Bi înan wazenê ke hereketê kurdan berteraf bikê. Çi heyf ke nizan û xizanî zî na polîtîka rê benê alet, adeta kurdan ra nefret kenê. Wazenê ke kurdan, yew çilka awe de bixeniqnê. 

HDP pird ê çarekerdiş o

Ma cor de zî vat bi ke, zafê ey, lajanê nê nizanan û xizanan ra polîsî û leşkerî yenê girewtiş. Nê polîs û leşkerî, wexto ke ciwananê kurdan kişenê rehet nêbenê, dima zî bi panzeran erd ra kirancenê. Aye ra cenîy kişenê, dima rut kenê û bi panzere erd ra kirancenê.Sedestê Tirkîya, menfetê xo yê şexsî, se menfeetê heme şaranê Tirkîya lanse kenê. Kurdan û sewbîna şaran bêfam û kofram, xo biaqil hesibnenê. Meclîs esto, labelê wezfeyê yew witrînî veyneno. Meclîs de, yew vengo cîya nêwazenê. Nêwazenê ke, kurdî wayîrê yew îradeyê sîyasî bibê. Nêwazenê ke, kurdî; bi namebê xo sîyaset bikê. Na ra tehamulê înan bi wekîlanê HDP çin o. Na ra destnêdayêşê HDPyan hewanayo. HDP seba çareserkerdişê meseleya kurdan yew pird bî. Nika nê wekîlanê kurdan wazenê raykê mehkemeyanê xo. Mehkemeyê înan zî sey înan ê. Înan de, heq, huqûq û edalet çin o. Mehkemeyanê înan de tam qomedî kay beno. “Çi heyf ke Hukmatê AKP, no dem de, şer hina gir kerd. Bellî yo AKP fek aşîtî û demokrasî ra fek verradawo. AKP polîtîkaya kiştişî de, şerî de israr kena. Şaristanî û qezayî xan û xirabe kerdê. Semedo ke hina vêşê cenazeyê ciwananê kurdan û tirkan bêrê, koyî, zozanê û goristanî yenê bombardimankerdiş.” Şima zaf behsê demokrasî kenê. La esla têgeyrê şima, têgeyrê demokrasî nîyo. Şima demokrasî zî qetl kerd. Eke şima na polîkaya şerî (cengî) de israr bikê, Tirkîya de yew qaoso pîl vejîno. Ma ra vatiş.

Xora destek zî nêdaynî DAIŞ

Ma na zanê ke, şîdet xo reyde şîddet ano. Yew het ra her roj operasyonî leşkerî û sîyasî benê, yewna het ra zî şaristanan de bombeyî teqenê û hima-hima her roj bi desan merdimî cuyê xo vînî kenê. Tewr peynî de Stenbol de, goreyê vatişan hîrê merdimanî DAIŞî, Balafirgehê Ataturkî de, verî bi çekan guleyî varnayî û dima zî xo teqnayo. No hedîse de 36 tenî ameyî qetilkerdiş û bi seyan merdimî bîrîndar bîyê. Ma nê merdan rê Homay ra rehmet, nizdîyanê înan rê sebir û bîrîndaran rê şîfa wazenê. Goreyê ma, eke dewlete û hukmatê Tirkîya, meseleya kurdan çareser bikerdnî, xora destek zî nêdaynî DAIŞî. DAIŞî zî eyro nişnaynî ina (wina) hewa nê bombeyan biteqno. Eke meseleya kurdan çareser bibîynî; xora no ceng zî nêbîynî û şer de ende merdiman zî cuyê xo vînî nêkerdnî.