SAFÎYE ALAGAŞ/ AMED/ŞÛJIN
Xeylê sîyasetmedarî seba ke bin banê Kongreya Komelê Demokratîke (KCD) de faelîyet kerdî, ewro yenî mehkemekerdiş. Tena sîyasetmedarî nê, îdîanameyê ke seba KCDyî yenî amadekerdiş, hemînan de KCD sey ke girêdayeyê KCKyî bibo yeno nawitiş û bi no hawa yeno îlegalîzekerdiş.
Babetê ke KCD pê yeno sucdarkerdiş ra yewe zî kotaya cînsîyetî ya. Dozgerî seba ke Sîstemê KCKyî de kotaya cînsîyetî esta, KCDyî sey bingeyê KCKyî nîşan danî.
Babete ser o Hemsereka KCDyî Leyla Guvene qisey kerde. Guvene va ‘nika tuzig û programê KCDyî yeno îlegalîzekerdiş’ û wina dewam kerde: “Nê çîyan ra yewe zî kotaya cînsîyetî ya KCDyî ya. Ma destpêk de sey polê cinîyan xo rêxistine kerd, dima ra no bî Tevgerê Cinîyanê Azad û Demokratîkî (DOKH) û ewro zî sey TJAye têkoşînê xo domnenî. Ma sey tevgerê cinîyan verê kotaya cinîye û dima ra zî ya cînsîyetî dîyar kerd. Dima ra heme dezgeyê welatperwerî nêyî esas girewtî. Çimkî cinîyî heme hetî de ca girewtêne. O wext ganî cinîyî mekanîzmaya girewtişê qerarî de ca bigîrî.”
Ma vera zîhînîyetê camêrdî de têkoşîn da
Guvene dewamê qiseykerdişê xo de dîyar kerd ke tevgerê cinîyan bi dayîşê bedelanê girdan ame roja ma ya ewro û wina va: “Mîyanê nê xebatan de lazimîyêka winasî vejîyaye orte û ma zî kotaya cînsîyetî dîyar kerd. Ma serekîya dîvanî ra heta komîsyonan kotaya cînsîyetî esas girewt. Pêroyîya delegasyonî de 501 kesî estî û nîmeyê ci cinîyan ra pê yeno. Eke KCK çîyêko winasî kerdo, baş kerdo. Çimkî ya raşt na ya. Cinîyî heme hetê cuye de bi têkoşîn ameyî roja ma ya ewro.”