Tarîx de kurdan her tim verva jûvînî da pêro. Tarîxê kurdan de jûyenî çîna, “birakujiye” esta. Bakur de nî 30 serranê peyenan de bi hezaran qorucu vejayî, verva şarê kewtî herb. Qorucî ke nêbiyenê, kurdê Bakurî ewro belka kî hebena serbest û quwetin bî.

Ala reye kî piyagurenayîsê peşmergeyan û arteşa dewleta tirkî biyarîme xo vîrî. Peşmergeyî bi quwetanê dewleta tirkî ra bî jû, bi hezaran gerîllayî qetil kerdî. Lewê naye de peşmergeyanê Barzanî û yê Talabanî kî jûvîn ra bi hezaran însanî qirkerdî. Quwetê dewletanê kolonyalîstan teyna bi xo verva kurdan pêronêda, kurdî verdayî pê, tey niyada. En jede bi yardimê PDK dewleta tirkî çond reye bi 10hezaran eskeran Başur de est quwetanê PKK ser. La nî serestîsan de kî her tim arteşa dewleta tirkî kerd vînd. Pêro herban ra PKK hebena quwetin vejiye.
Rojhilatê Miyanî de ke çond herbî bî, nî herban ra PKK  bi serkewtîs vejiye. Peyê PKK de yardimê dewletan çînê bî. Teyna şarê kurdî û koyanê kurdan poşt dayê gerîllayanê PKK. 1991 de waxtoke herbê kendawe yê virenî dest kerd ci, her kesî vatenê “PKK endî qediye.” Waxtoke 2003 de herbê kendawe yê 2îne dest kerd ci, onca eynî dorman vatenê “PKK na raye endî rastke qedîna.” Çike domonanê emperyalîzmî vatenê “Amerîka Rojhilatê Miyanî de estbiyayena PKK rê desture nêdana.” Hewnê nî domananê emperyalîzmî rast nêvejiya. Eksê ci bî, PKK krîzan û herbanê Rojhilatê Miyanî ra her tim bi enerjî û quwete vejiye.
Waxtoke dewletanê Avrupa serranê 90 de dest kerd ci, PKK kerde qedexe, onca vajiya ke PKK binê nî şertan de endî nêciwiyena. Taye kurdan poşt dayê nî dewletan, tayîne kî tekoşîne caverdê, şî çeyanê xo. La raştiye de, a roze ra na het kî tenena jede kurdî tewrê tekoşîne bî. Bêbedel nêbî, la şervan û qadroyê PKK zerrê adirê Rojhilatê Miyanî de bî polat û kewtî ser. Kesanê ke binkewtena PKK pîtenê, bi xo ginayî waro, kewtî bin. PKK her dem seweta pawitena herdê Kurdîstanî venga rêxistin û partiyanê Başurî da, la cevabo de pozîtîf nêguret.
Nika jû garana qetilkaran bi name DAÎŞ vejiyê, kurdî jûvînî ra kerdî nejdî. Dem endî demê jûyenî yo. Rixmê televîzyonê serekcaş Rudaw tv, kurdî besekenê jûyena xo ronê. Hora şertan kurdî ardî têlewe. Biwazê nêwazê, nika jû mereve de piya danê pêro. Nî rozanê peyenan de PKK peyê vatîsanê xo de vinete, Mexmur, Şengal û Kerkuk de herdê Kurdîstanî pawena. Sire nika amo quwetanê Başurî. Quwetê Başurî gune îspat bikerê ke teyna roza tenge de nê, ê binê pêro şertan de jûyena kurdan de samîmî yê. Hen oseno ke kamî ke na merevê jûyenî caverda, Kurdîstan de amayîsê ey yo siyasî endî qedîno.