Rojname, kovar û pirtûkê bi kurdî roj bi roj zêdyenê. Sazgehanê kurdî ra piya, înisiyatîfê lokalî zî serva wayirvetişê ziwanê xo û verîgirotişê asîmîlasyon û otoasîmîlasyonî kewtî hereket. Jew înisiyatîfê heremî yê gencanê Muşijî zî destpa gureyineke erja, weşînayişê kovara Bar kerdî. Gencê ke waştî serva ravey berdişê kurdî çiyê bikerê, qerarekê winayîn girotî. Kovarî de nuşteyê derheqê kultur, senat, edebiyat, mizîk ra piya babedanê ciya de nuşteyê lekolîn dê ca bigîrê.
Ziwanê xo ra razî bicuwyê
Derheqê weşana pirziwanî de zî gurekarê kovarî vistî vîrî ke îyenan nêwaşt ke kovar de tenya jew lehçe ca bigîro û hayr antî ser pir rengîniya kurdî ser.
Gurekarê Bar’î anê ziwan ke, ê wazenê ziwanê hardê qedîm kurdî bi raya kovarî biresnê neslanê newî. Edîtoranê Bar’î ra Berfîn Ogut vist vîrî ke Bar kurdan rê zey jew selam o. Ogut va, bi na gam ma wazenê ke kurdî bi ziwanê xo ra razî bicuwyê. Berfîn Ogut da aşkere kerd ke, ziwan raverşiyayişê şarî de jew kopri yo.
Ogut ard ziwan ke, ganî her jew ferdê Kurd ziwanê maya xo bizano, weşanê ke vejyenê biwano. Ogut va, eke mesele biyayiş û nêbiyayişê jû şarîya se, rehet nezdîbiyayiş nêbeno. Ogut peynî de ard ziwan ke, ziwan xecr o ke rih û bedenê jû mîlet keno jew o. Kovara Bar ke do çehar aşman de reyna bivejyo, homara sifteyîn aşma verên de Stenbol de çap bî.
STENOL