Bi wesîleya serrgêra 34. ya Hemleya 15ê Tebaxe de Warê Pawitişê Medya de merasîmêka girde ameye viraştene. Xeylê fermandar û şerwanî beşdarê merasîme bîyî û bi coşêko gird Roşanê Ganîbîyayîşî pîroz kerdî. Karayilanî merasîme de qisey kerd û wina va: “Ma do şerêko qehremanî ke heme dinya şahidîya ci bikero, bikerî.”
Serrgêra 34. ya Hemleya 15ê Tebaxe sere de koyanê Kurdistanî û xeylê cayanê bînan de ameye pîroz kerdene. Nê cayan ra yewe zî Warê Pawitişê Medya yî. Bi wesîleya Roşanê Ganîbîyayîşî Warê Pawitişê Medya de merasîma pîrozkerdişî ameye viraştene.
Merasîme de posterê Rayberê Şarê Kurdî Abdullah Ocalanî, beyraqê PKK, KCK, HPG û YJA-Starî û posterê fermandarê efsanewî Mahsum Korkmazî ameyî aliqnayene. Fermandarê Merkezê Pawitişê Şarî Murat Karayilan, Zozan Çewlîge, Bahoz Erdal, Koçero Urfa, Endama Fermandarîya Qerargehê Merkezî Emîne Ercîyese beşdar bîyî.
Merasîme bi deqayêk rêzgirewtişî dest pêkerde û merasîme de Karayilanî qisey kerd. Karayilanî qala Hemleya 15ê Tebaxe ra ver kerd û netîceyê Hemleya 15ê Tebaxe pare kerd. Karayilanî wina va: “Ewro dewleta tirkî wazena ruhê 15ê Tebaxe bipelçiqna û qirkerdişê kurdan temam bikera. Verê hêrişê Şorişê Rojawanî kerdî, dima ra hêrişê Şengal, Başûrê Kurdistan, Mexmûr û Kerkûkî kerdî. 3 serrî yo ke Vakurê Kurdistanî de şerêko giran domîyeno. Nika şexsê Rayber Apoyî de hêrişê îradeya şarê ma kenî.”
Pêro pîya binkewenî
Karayilanî dewamê qiseykerdişê xo de wina va: “Mîyanê 3 serran de dagîrkerîya tirkan vera gerîla de her tewir hêrişî kerdî. Eynî wext de hêrişê dostanê kurdan, sîyaseto demokratîke yê kurdan kerdî û dest ser nayî heme şaredarîyanê kurdan. Nê hêrişan de dewleta tirk û çeteyê ci sernêkewtî, pêro pîya binkewtî. No şer şerê rêxistinêkî nîyo, şerê neteweya kurdî yo. Eke Kurdistan de tayê sîyasetmedarî na raştîye nêvînenî, yan kor î yan zî bêwijdanê ke nêwazenî bivînî yî. Ganî her sîyasetmedar Kurdistan de goreyê menfîetê şarî hereket bikero. Eke wina nêkerî ma do înan ra hesab bipersî.”
Lazimîye bi yewîye esta
Karayilanî qiseykerdişê xo de qala yewîya neteweyî kerd û wina va: “Prosesêko winasî de lazimîya ma bi yewîya neteweyî esta. Proses, prosesêko normal nîyo, tehlukeyîn o. Gerîla do her şert û mercî de heq û menfîetê şarî bipawo. No şero pîroz de çi bikewo milê gerîla, gerîla do bikero. Labelê ganî ciwanê kurdan û şarê ma yê welatperwer ganî wayîrê berpirsîyarîya xo bivejîyo û têkoşînê xo berz bikerî. Ganî heme ciwanê kurdan no prosesêko tarîxî de beşdarê gerîla bibî û cayê xo govenda serkewtişî de bigîrî. Ma do şerêko çetîn bikerî û heme dinya zî şahidîye bikera.”
Karayilanî qiseykerdişê xo bi siloganê ‘Bicuye Ruhê 15ê Tebaxe’, ‘Bicuye PKK’, ‘Bicuye, Bicuye Rayber Apo’ qedêna. Qedîyayîşê qiseykerdişê Karayilanî ra dima gerîlayan sîlehê xo hewanayî û bi coşêko gird silogananê ‘Bicuye Rayber Apo’ û ‘Bicuye PKK’ eştî.
ANF / BEHDÎNAN