Koyan ra dima nika zî parke pêşkêş ancîyena

Herêma Dêrsimî ke tarîx ra nata hertim raştê hêriş û talanê dewlete ameya, nika zî sewbîna hetî ra bîya hedefê talanî. Verê cû amebi dîyayene ke 145 projeyê madenî Koyanê Muzirî ser o amebî plankerdene. Nika zî vejîya werte ke nê projeyan ra tayê ci Parka Mîlî yê Muzirî zî gêno mîyanê xo.

Parka Millî ya Muzirî pêro pîya 43 hezar dolime erdo ke Çimeyanê Muzirî, Çemê Muzirî, Newala Mercanî, Çirrê Çewrês Merdîwanan, Girê Tulînî, Tepecîk û Pulûrî zî gêna mîyanê xo ser o amebî îlankerdene.

Babete ser o avukat Bariş Yildirimî qisey kerd û vera projeyan de reaksîyon nîşan da. Yildirimî da zanayene ke aşmêk mîyan de destûr dîyayo 4 projeyanê madenî rê û wina domna: “Wareyo ke seba madenî ruhsat dîyayo ci, Parka Millî ya Muzirî ra hîrayêr o. No ware wareyê parke zî gêno mîyanê xo. Wareyo ke seba madenî destûr dîyayo ci de hezar 900 tewir nebatî estî û nê nebatan ra 43 tewirê ci tena Koyanê Muzirî de estî û 227 tewirî zî tena Tirkîya de estî.”

Yildirimî va ‘Qezaya Erzînganî de bi sîyanurî altûn gêrenî û eşteyê ê gêrayîşî tewrê çemî beno’ û wina domna: “O zî zirar dano tebîetî. No gêrayîş nika ver bi Pulûrî hîra beno. Ma vera nêyî de prosesê huqûqî dayo destpêkerdene. Ma Mehkemeya Îdareyî ra qerarê betalkerdişî vet. Tena Muzir de gandarê ke cuyenî qasê welatê ke estî. Nê projeyê ke erzîyenî dewre tebere projeyanê madenkarî yê mîyanneteweyî de yî û amancê înan bêmerdimkerdişê herême yo. Eke wina bibo gandarê herême do zaf zirar bivînî.”