Kurdistan de zafaneyê ci bi gule û bombevarnayîşê lejkeran bi seyan dolim daristan ame veşnayîş û mîyanê aşmekî de daristanêy Gelîyê Godernê, Cudî û Licê amey veşnayîş. Encama veşnayîşê ke dewlet ti mudaxaleyî nêkeno de hetê seyan dolim daristanî de bi desan heywanî zî telef bîy.
Talankerdişê xozayî
Pawitoxê Şaristanê Stenbolî Denîz Ozgur dîyar kerd ke bi îlankerdişê şer, daristanê Kurdistanî yeno çinîkerdiş û wina domna: “No bi talankerdişê xoza, qirkerdişê dormare û texrêbatê daristanî no hawa vecyeno teber. Rojawanê Tirkîya de bi nameyê rantî, Kurdistanî de zî bi nameyê ‘Xoverdayîşê bi terorî ra’ ekolojî yeno qirkerdiş.”
Ma daran ronenê
Ozgur ard ziwan ke ekosîstem ya heme erdnîgarî yo, no semed ra ma nêverdanîy ke desthilatdarî xirab bikero û wina dergeyî da qalîkerdişê xo: “Semeda ke ekosîstem ya pêroyîn o. Ziwan û nîjada ci çin o. Helwesta ke par wexto ke bexçeyê Hewselî amey veşnayîş de bertekêy ke şar mojnay lazim o ke eyro semeda nêy daristanan zî bêro mojnayîş. Ma wazenîy demo ke tewr kilm şêrî Silopî de daran biçînîy.”
Bi çimsûrî hêrîş keno
Komeleya Azadîya Yeryuzu Burak Ozguner zî ard ziwan ke dewlet bi çimsûrî hêriş keno, xoza qetil keno û wina domna: “TSK bi serran bombe varnayî ser û heme ca veşnayî. Bi bombevarnayîşê newe hêriş kenîy. Lazim o demo ke rewêr bombevarnayîş bêro vindarnayîş. Dewlet bi awayo fermî kayan kay kena. Tu sebebê operasyonan çin o.”
Ma do doz biakerîy
Ozguner dergeyîya qalîkerdişê xo de ard ziwan ke konsepta şerî heme ganîyan çinî keno û wina domna: “Ma bi pawitoxê heqê merdiman Mehkemaya Cezayî ya Mîyan Netewî rê do sere pirodîy û derheqê Erdoganî de dewa biakerîy.
Medya bê veng o
Ozguner ard ziwan ke lazim o texrîbata ekolojîk ya ke dewlet keno bêro teşhîrkerdiş, la medya hemverê nê de bêveng o û pêroyîna şarî xapênena û wina vat: “Zîhnîyeteko no awayîn do merdim, heywan û xozayî qetil biko.” Endama Komeleya Rindî û Pawitişê Parqa Gezî ya Taksîmî Mevhîbe Gozcelîoglu zî ard ziwan ke erdnîgarîya Kurdistanî bi temamî yeno qirkerdiş û wina domna: “Armancê bê daristan verdayîşî, bê merdimkerdiş o.”
Pawitişê cewherî şert o
Ozgur dergeyîya qalîkerdişê xo de ard ziwan ke nêy hêrişan ver heme ganî yenî qirkerdiş û no zî encax bi pawitişê cehwerî eşkeno bêro vindarnayîş û wina vat: “Lazim o dijî heme hêrişanê xoza û cuyayîşî ver, şar bi rayvistinî têbigêro û vernîya nê zî biakero. Semeda cuyayîşî merdim senî ke xo paweno lazim o ke semeda xoza zî heman awayî têbigero.”
DÎHA/STENBOL