SUAY ABAK / MUSTAFA YUKSEL / PÎRHA / SEMSÛR
Koyê Nemrudî ke berzîya ci 2150 metre yo û mîrasê UNESCO mîyan de ca gêno, wayîrê dewlemendîya kulturî ya 2 hezar serran o. No ko wextê Qiralîya Kommagene ra mendo û dima ra kewto binê hakimîya Roma.
Muhendîso alman Karl Sesterî serra 1881î de wextê viraştişê rayîran de ferq kerdo ke nê eserê tarîxî yî û hetê qiral Antîochoso 1. ra ameyî viraştene. Dima ra serra 1987î de girîyayo Lîsteya Mîrasê Dinya ya UNESCO. Zîyaretkerdoxan ra parlamenterê HDPyî yê verên Mehmet Alî Aslan va ‘wexto ke ez vejîyaya tîya, ez rehet bîya û seke gonîya ma pak bibo’ û dîyar kerd ke o pêşnîyazê herkesî keno.
Dîlek Yildize zî kênaya xo reyde vejîyaya koyî ser. Yildize va ‘mi xeyalê domanîya xo pê ard’ û wina domna: “Wexto ke ma ameyî, wesayîtê ma xira bi û ez tersaya ke ez do nêvîna. Labelê ma rayberêk ra rîca kerd û ma ameyî tîya.” Mêrdeyê Dîleke Îsmet Yildizî zî wina va: “Ma bi teknolojîyê ewroyî zî nêşênî bifikiryî. Labelê ez bawer kena ke o wext goreyê ewro hîna aver de bi. Wa herkes bêro tîya bivîno.”
Ez do reyna bivejîya
Serekê Komela Raywananê Fotografkêşan ya Semsûrî Musa Gurbuzî zî va ‘ez bi desan reyan vejîyaya, labelê ez do reyna zî bivejîya’ û wina dewam kerd: “Wexto ke merdimî vejîyenî cor, zaf betilîyenî. Ganî seba merdimanê astengdaran zî teleferîk bêro viraştene. Eke teleferîk bêro viraştene, o wext do hîna zaf kesî do bêrî tîya.”