Roje çin a ke xebera texrîbkerdişê tebîetê Kurdistanî nêra. Bitaybetî bin nameyê operasyonanê leşkerî her roje cîya cîya hetan de koyî yenî bombe kerdene, daristanî yenî veşnayene, baraj, HES û sewbîna çîyî yenî viraştene û zirar dîyeno tebîetê Kurdistanî.
Nînan ra bitaybetî tebîetê Dêrsimî hedefê dewlete de yo û tarîx ra nata dewlete hewl dana tebîetê Dêrsimî çinî bikera û herême bêmerdim bikera. Ame musayene ke qezaya Xozatî ya Dêrsimî bi teyarayê şerî, wesayîtê sîlehinî yê bimêrdimî (SÎHA) û helîkopteran ameya bombe kerdene. Koyê Sincikî ke qezaya Xozatî de maneno, hetê teyarayan ra ameyo bombe kerdene. Dima ra helîkopter û SÎHA dest bi bombekerdişî kerdî. Bombe kerdene nizdîyê 2 saetî dewam kerda. Reyna goreyê melumatê çimeyanê herême ca bi ca pêrodayîşî zî qewimîyayî.
Heto bîn ra netîceyê bombekerdişî de şewatê daristanan vejîyayo û şewat xeylê hîra bîyo. Ame musayene şewat ser herêmanê Zogar, Zenge, Koçerî, Bozan, Koskozulca û Dundulî de vila bîyo û bi hezaran dolime daristan bîyo wel.
DÊRSIM