Hemserekê Heyetê Caardişî yê TEV-DEMî Aldar Xelîlî konferansê Hêzê Ewleyîya Zereyî yê Vakurê Sûrîye ke Reqqa de ame viraştene de qisey kerd. Xelîlî qala muhîmîya konferansî kerd û dîyar kerd ke konferans gamêka girde yo û nîşaneyê cesaretî yo.
Xelîlî da zanayîş ke Vakurê Sûrîye de kurd, ereb, suryanî û heme hetê bînî pêro pîya bi hawayo waye û bira cuyenî û no zî tarîxê Sûrîye nîşan dano û wina domna: “Îdareyê merkezî sebebê zulm û tedayan o. Hêzê teberî mudaxaleyê rewşa Sûrîye kenî û no zî emrê krîzî derg keno. Dagîrkerîya Efrînî ya dewleta tirkî emrê krîzî derg keno û ganî no nêro vîrî kerdene. Merhaleyê dîyine yê xoverdayîşî domîyeno û ganî Efrîn bêro azade kerdene.”
Xelîlî dewamê qiseykerdişê xo de wina va: “Ma agêrayîşê rejîmî qebul nêkenî. Xora eke ma qebul bikerdêne, ma hende şoriş nêviraştêne. Madem ma cuyêka rûmetine îlan kerde, o wext tercîhê ma awankerdişê Sûrîye yo. Krîzê Sûrîye bi raybazanê leşkerîyan çareser nêbeno. Krîz bi şerî nê, ancax bi dîyalogî çareser beno. Ma verê cû zî vatbi; ma seba dîyalogî amade yî, labelê heta nika gamêka cîddî nêameye eştene.”
Heta nika dîyalogêk nêvirazîya
Xelîlî bale ant tayê îdîayan ser û wina va: “Tayê hetî medyaya komelkî ser ro tayê îdîayan erzenî orte. Raştîya nê îdîayan çin a. Heta nika mabênê ma û rejîmî de dîyalogêk nêbîyo. Ma vera hêrişan de amade yî û yo mûhîm zî no yo. Îttîfaq bibo zî nêbo zî têkoşînê ma domîyeno. Ma do qezencanê xo bipawî û xeta şehîdanê xo de şêrî.” n ANHA/REQA