Rayberê Şarê Kurdî Abdullah Ocalan 15ê Sibata 1999î de bi destekê hêzanê mîyanneteweyîyan teslîmê Tirkîya amebî kerdene. Ocalan o wext ra nata binê tecrîdî de yeno tepiştene. Ocalan 27ê Temmuza 2011î ra nata bi avûkatanê xo, 5ê Nîsana 2015î ra nata bi Heyetê Îmrali yê HDPyî û 11ê Êlula 2016î ra nata zî nêşêno keyeyê xo reyde pêvînayîş bikero. Parlamentera HDPyî ya Riha Ayşe Surucuye derheqê tecrîdî de qisey kerde û dîyar kerde ke tecrîdo ke bi hawayo sîstematîk yeno domnayene, heme şaranê Rojhelatê Mîyanênî girewto binê tesîrê xo. Surucuye daye zanayene ke Tirkîya nika kaos ra miqate bena û rayîrê kaosî ra vejîyayîşî Îmrali ra derbaz beno û wina domnaye: “Tirkîya de 2013 ra heta 2015î prosesê aştîye estbî. Badê ke Erdoganî va ‘ma mutabakatê Dolmabahçe nêşinasnenî’ şer dest pêkerd.” Surucuye va ‘3 serrê peyênan de tecrîd hîna ameyo giran kerdene’ û wina dewam kerde: “Çîyê ke ameyî cuyayene dîyar î. 150 hezar merdimî ameyî îxraç kerdene, qayûmî tayînê şaredarîyan bîyî. Cinîyî ameyî hedef girewtene û dezgeyê înan ameyî padayene. Nê heme bi giranbîyayîşê tecrîdî zêde bîyî. Ma veng danî CPT ke wa vera tecrîdî de reaksîyon nîşan bido. Tena muxatabê çareserîye Ocalan o. Eke tecrîd wedarîyo, o wext kaos qedîyeno û huzir yeno. Ganî ma vera tecrîdî de xover bidî û tecrîd bişiknî.” JINNEWS/RIHA