Her ke şono krîzê ekonomî hîna kûr beno. Kuçeyê tarîxî yê Havra yê Îzmîrî de krîzê ekonomî yê 40 serran yeno cuyayîş. Kuçeyê Havra serra 1605 de hetê yahudî û rûman ra awan bîyo û şewatê 1922 ra dima ewja de krîzêko xeylê gird ameyo cuyayîş. Aye wext ra nata krîzêko winasî nêameyo cuyayîş û vayebîyayîşê dovîzî kuçeyê Havra ard çinîbîyayîşî ver. Esnafê ke payan ser de mendî çareserîya ekonomî kar ra vetişê karkeran de dîyî.Babete ser o esnafî qisey kerdî.
Şehmuz Yilmazo ke 21 serrî yo ke esnafî keno, qiseykerdişê xo de wina va: “Herînayîş se ra 50 kêmî bîyo. Fîrmayê pîlî rewşa krîzî kerdî firsend û heme çîyan vaye kerdî. Rewşa psîkolojîyê ma baş nîya. Edî ez nêeşkena bivindera. Domanê mi çinîbîyayîş ver dest bi xebate kerdî.”
Kesî de pere nêmendo
Hidir Golcuyo ke 12 serrî yo esnaf o, va ‘kîloyê firingîyan bîyo 6-7 TL’ û wina domna: “Tirkîya de firingî yena resnayîş, hende vayî senî bena. Ganî seba çareserî rewşe baş biba û têkilîya ke bi welatê teberî yenî ronayîş, bêrî başkerdiş.”Esnaf Ahmet Karadenîzî zî va ‘merdim nêeşkeno rewşa xirab bîyaro ziwan’ û wina dewam kerd: “Verê herînayîş zêde bî. Şar bi torbeyan ameyêne sûke. Kuçeyê tarîxî de krîzê 40 serran esto. Verê ma roje de 150 TL dayêne karkeran, la nika ma 75 TL danî. Ma nêeşkenî debara xo bikerî.”Esnafe Eda Sakaryaya ke 53 serrî yo ke esnafî kena qiseykerdişê xo de wina va: “Ti kes de pere nêmendo. Muşterîyî tezgahan ra destveng agêrenî. Ma nêeşkenî krîzî ver xover bidî.”Hakki Altintaşo ke şenikîya xo ra esnafî keno, wina va: “Verê tîya zaf qelebalix bî û muşterîyê ma xeylê zêde bîy. Nika çew nêmendo.”Tewr peynî cinîya Altintaşî Sadet Altintaşe va: “Ma hewl danî ke çîyê wişkan biroşî. Ti kes sîparîş nêdano. 5 hezar TL deynê ma yê bacî ameyo pêser û ma nêeşkenî bidî. Verê tîya cayê turîstan bî. La nika turîstêk daxî nênemdo. Krîzê ekonomî her ke şono hîna kûr beno.”
DÎHABER/ÎZMÎR