Esnafê ke Sûka Zaferî (Sûka Bîtî) ya Mêrsînî krîzê ekonomî ra xeylê tesîr bîyî û yew bi yewe dikananê xo qefilnenî. Sûka Zaferî ke verê cû xeylê qelebalix bîye, nika bîya bêveng û kesêk çîyêk nêherîneno.Babete ser o esnafê sûke qisey kerdî.
Esnafan ra Mahîr Kayayo ke 17 serrî yo sûke de esnafî keno, va: “5 serrî yo ke krîzê ekonomî esto. Karê ma nîme nîm kewto. Ne rotiş ne zî herînayîş esto.” Huseyîn Durako ke 40 serrî yo Sûka Zaferî de gureyê rotişê haletanê desto 2. keno, wina va: “Ma heta şewe dikanan akerde verdanî la ti karêk nêkenî. Ma ameyî qefelnayîşî ver. Welat de krîzêko nimite esto. Verê cû ti kes nêşa tîya de dikanê vengan kîra bikero, la nika heme dikanî veng î.”
Yew zî nêroşîyeno
Ahmet Gundoganî zî 20 serrî yo ke esnafî keno, qiseykerdişê xo de wina va: “Verê cû mi rojêk de 40-50 citeyê solan rotêne. Nika ma rojêk de nêeşkenî citeyêk zî biroşî. Krîzê ekonomî û magazayê pîlî esnafan qedênayî. Ganî rewşe bêra başkerdiş. Seba başkerdişê rewşa ekonomî, estena esnafan şert o.”
MÊRSÎN