Konseya Rayverîn yê KCK verîya çend rojan seba Rayverê Şarê Kurd Abdullah Ocalan ke wextekê derg o ci ra xeber nîna giroten vengê vejyayişê kuçeyan da. Na vengdayişî rê cenîyan ra cewab ame. Cenîyan aşkere kerdî ke heta ke Ocalanî ra xeber bîro giroten iyê dê kuçeyan terk nêkerê.
Cenîyê ke Stenbol de ciwîyenê derheqê vengdayişê vejyayişê kuçeyan yê KCK de qisey kerdî û day zonayen ke bi roniştiş nêbeno û venga werzayişê ser payan day. Cenîyan ra Meyaser Aladag a 45 serrî vist vîrî ke ganî pêrokîn şar, cenî, doman, kal û pîrî vejerê kuçeyan. Aladag va ganî ma Rayverê xo, alwozê xo het de bê û veng bidê vengdayişê KCK. Meyaser Aladag da zonayen ke rixmê veşnayişê keyeyanê înan iyê dê bi înat tekoşîna xo bidomnê û venga pîya hereketkerdişî û rêxistinbîyayişî da.
‘Şarî pawenime kuçeyan’
Gurekara tekstîlî Yonca Çelîk ke tewrê vengdayişê KCK bena ana ser ziwan ke her deqeyo ke Ocalanî ra xeber nêgênê de sebrê înan hona jêde ser ra şino. Çelîk aşkere kerd ke na rewş înan qisawetnena û va ma dê seba ravêrnayişê na rewşî nêrazîbîyenê xo bi nûmayişan damûsnê.
Dadîya Haştî Sîmanperê Akyildiz zî da zonayen ke ganî na seat ra tepya şarê kurd vejero kuçeyan û heta ke Rayverîye ra xeber bîro giroten zî kuçeyan veng nêkero. Akyildiz vist vîrî ke Ocalanî ra jû serrîyo xeber nîna giroten û waşt ke seba Ocalan herkes bikewo hereketî. Sîmanperê Akyildiz aşkere kerd ke heta ke bi Ocalanî pêdiyayinî destpa nêkerê iyê dê kuçeyan ra peyser nêancîyê.
‘Heta peynî Rayverîye xo het de me’
Cenîya bi nameyê Nezahat Suer ya 53 serrî zî bi vatişanê ‘Rayverîye ma hepis de yo, cuya ma hepis de ya’ hayr ant şert û mercanê Ocalanî ser. Suer va ma hemverê Rayverîye xo de bedel da û qiseyanê xo wina domna: “Ma heta peynîya gonî û ganê xo Rayverîyê xo het de yê. Ma dê gonîya şehîdanê xo erdî de nêverdê. Ma pey hard û Rayverîye xo de yê û xoverdayişê xo ramenime. Heta ke jû dayik pey de bimano ma dê kuçeyan de pawitişê cuyî dewam bikerê.
Ganî sifte cenî vejerê kuçeyan
Bîrsen Karabacak zî vist vîrî ke tecrîdo ke ser Ocalanî yo zaf giran o û hayr ant nêviraştişê pêdiyayinan ser û va: “Seba nayî ganî ma pêrokînî bixebtê. Ma cenî rayverîna nayî kenê. Ma dê heta peynî kuçeyan de bê.” Wendekara bi nameyê Şîlan Beyret zî vengdayişê KCK da ce dî û aşkere kerd ke iyê dê zî zey cenîyanê genc kuçeyan de nûmayişanê xo biramnê.
Cenîya bi nameyê Bînguzel Ûlû ke gureyînanê azadîyê Ocalanî rê rayverîn kena zî wina vana: “Gureyînanê ma rê paştdayişekê gird hewce keno. Ganî cenî rayverîya nayî bikerê. Ganî sifte cenî vejerê kuçeyan.”
Cenî şenê herbî vindernê, haştî bîyarê
Cenîya bi nameyê Gulîstan Aydin zî vist vîrî ke wedarnayişê tecrîdî girêdayê gureyînanê şarê kurd o û bi nê vatenan veng da şarê kurd: “Ganî ma hendê dîn û îmanê xo qedr bidê nê gureyînan. Ganî ma pêrokîn tepişteyan azad bikerê. Veng dana pêrokîn dayikan, ma vejerê kuçeyan, meydanan û Rayverîye xo azad bikerê. Bi Rayverîye ra pîya pêrokîn tepişteyî dê azad bê.
Demet Gumuş a 35 serrî zî hayr ant rewşê herbî yê Tirkîye ser û va: “Tirkîye nika şina herbî, na rewşî de keye de roniştiş nêbeno. No herb dûştê pêrokîn kurdan o. Wazenê kurdan biqedînê. Heta ke Rayverîye kurdan azad nêbo, şarê kurd zî azad nêbeno.” Gumuş vist vîrî ke tekoşîn de cenî rolekê muhîm kay kenê û va cenî wayîrê quwetekê girdî yê. Eke biwazê êşkenê herbî zî, haştî zî bîyarê.
DÎHA/STENBOL