Cizîrê Şirnexî de hêzê dewlete binê nameyê ‘Qedexeyê Papolan’ de mabenê saetê 23.00 û 02.30’î de papolan de zilmê welatij û domanan kenî. Domanê nê saetê ‘qedexe’ de papol de bi gude kay kenî raştî gef û şîdetê polîsan yenî. Domanê 13 serra Furkan Ercan dîyar kerd ke polîs roj û şew bi wesayîtê zirxî papolan de gêrenî û anonsê ‘şîrê banê xo eke şima nêşîrî ma do şima bitepişî û bierzî zîndanan’ kenî û ray ray zî gefa ‘eke şima nêşîrî banê xo ma may û pîyê şima bibî zîndanî.” kenî.
Ma nêşkenê kay bikerê
Ercan ciresna ke seba zordarîya polîsan ê nêeşkenî bi rehetî verê banê xo de kay bikerî û wina vat: “Seba ke Cizîr zaf germ o ma şan de nêeşkenî zere de banê xo de roşî. Ma zî vejîyenî papolê xo ver û xo ra guda lingan kay kenî. Her roj polîsê erdîşê ci derg û çeteyê DAIŞe yî yenî ser papolî û ma ra vanî; domanê bêaqil şîrî banî û bi na awayî heqaret ma ra kenî. Ma wazenî bi embazê xo yê doman ra taxe de kay bikerî. Polîs binê nameyê ‘qedexe’ de ma ra zilm kenî.”
Persê ‘Terorîst’î kotî de yê’ kenê
Domano bi nameyê Muhammed Dadak (12) zî dîyar kerd ke verê çend rojan zaf polîsan taxa Nûrî de doman ra dayî piro û wina dewam kerd: “Polîsan çend roja verî 4 domanê taxe girewtî û înan ra dayî piro. Polîsê bi emrê xo pîl, por û erdîşo derg bêmîyan persê ‘terorîst’ kura yî, do key xendek û barîkatan bivirazî ma ra kerdî. Ma zî vanî ke ma doman î û ma nêzanî. No ser zî ma ra vanî şima zur kenî û vanî ke ‘terorîstan’ banê şima xirap kerdî û ma zî vat nê înan xirap nêkerdî û nêveşnayî.”Şênîya taxa Nûrî, Zînet Kuçuk zî vatîşê domanan raşt kerd û vat ke hêzê dewlete her roj papolê Cizîrî de gefê ke ‘ma şima bikişî şîrî banê xo’ kenî û da zanayîş ke çend roj verî polîsan peynîya domanê ci kewtî û hetanî zereyê banî û vatî ke ‘kamîya doman û hemserê xo bidî, ma do înan bibî mudirîya polîsan’.
DÎHA/ŞIRNEX