Ji bo şervanê YPG’ê Genco taziye li Mizgefta Hecî Îbrahîm Gerdî ya Hewlêrê hatiye danîn û ev du roj in taziye dewam dike. Li cihê taziyê li gel malbata şervanê YPG’ê Genco, Partiya Çareseriya Demokratîk ya Kurdistanê (PÇDK), Nûnerên Koma Civakên Kurdistanê (KCK), Nûnerên Partiya Herêmên Demokratîk (DBP), Nûnerên Partiya Yekîtiya Demokratîk (PYD), Rêxistina Jinên Azad ên Kurdistanê (RJAK), Komeleya Jiyanewey Gencan amadebûn. Di roja duwem de jî serdanên taziyê bigirseyî têne kirin û di navê de PDK, YNK, Tevgera Goran û Komeley Îslamî Kurdistan jî gelek partiyên siyasî, civakî, rewşenbîr, hunermend, nivîskar, helbestvan û kesayetên têne naskirin bi meşekê heta bi Mizgefta Hecî Îbrahîm Gerdî meşiyan û sersaxî ji malbatê re xwestin.
Dayîka Şervanê YPG’ê Genco Hesekê di taziyê de axivî û bixêrhatina hemûyan kir. Dayîka Genco got, “kurê min bi awayekî pir bihêz beşdarî nava şoreşa Rojava bû. Kurê min li Şengalê ji bo namûs û şerefa xwe şer kir. Ez bi kurê xwe serbilind û şanaz im. Ez malavahiya PKK’ê dikim. Kurê min du salan di nav PKK’ê de xebitî. Elhemdulalah kurê min şehîd e.”
Paşê hevseroka PÇDK’ê Necîbe Umer axivî ûgot, “li Şengalê, Sinûnê, Mexmûrê, Celewla, Kerkûk, Xaneqîn berxwedaneke pir mezin tê meşandin. Genco bi awayek dildar beşdarî nava refên YPG’ê bû û piştî êrişa li ser gelê me yê Êzidî ê Şengalê derbazî Şengalê bû. Li vir bi awayek qehremanî şer kir. Tevî birîndariya xwe jî, parastina gelê xwe kir û li Sinûnê bi qehremanî û netewî şehîd bû.”


 HEWLÊR