Çarçewaya roja Vera Dagîrkerîya Tirkî de Vindetişî ya Dinya de xeylê cayanê Ewropa de çalakîyê protestokerdişî ameyî viraştiş. Danîmarka, Almanya, Yewnanistan, Avusturya, Belçîka û sewbîna cayan de bi hezaran kurdî û dostê kurdan vejîyayî raşteyan û dagîrkerîya artêşa tirkî ya Efrînî protesto kerdî û bale antî qetlîyamanê dewleta tirkî ser.
Çalakîyan de bi siloganê ‘Bicuye Kurd û Kurdistan’, ‘Bicuye Rayber Apo’, ‘Qatil Erdogan’ û sewbîna rayîrşîyayîşî ameyî viraştiş û çalakîyan de qiseykerdişê ke dagîrkerîya dewleta tirkî protesto kenî ameyî kerdiş. Bitaybetî çalakîya ke bi rayberîya platformê Save Efrînî de ameye viraştiş de Saîme Bîlene qisey kerde û wina va: “Dewleta tirkî hewl dana qezencanê kurdan çinî bikera. Hêzê mîyanneteweyî zî vera qetlîyaman de çimê xo gênî. Ma veng danî herkesî ke wa vera kerdişanê teberê merdimîye de bivinderî.”
Çalakîyan de bale ancîya tecrîdo girankerde ke Rayberê Şarê Kurdî Abdullah Ocalanî ser o yeno domnayîş ser û azadîya Ocalanî ameye waştiş. Çalakîyan de ame waştiş ke wa herkes raya xo weçînayîşê 24ê Hezîrane de bido HDP û Demîrtaşî. Temsîlkarê xeylê dezgeyan beşdarê çalakîyan bîyî û çalakîyan de beyraqê PYD, YPG/YPJ, TJK-E û posterê Ocalanî ameyî kiriştiş. Çalakîyan de vilawekî ameyî vilakerdiş û derheqê dagîrkerîya dewleta tirkî de melûmatî dîyayî dorme.
ANF / BRUKSEL