15ê Tebaxe. 19ê Temuze. 23ê Temuze. 28 serrî ra tepiya onca Şemzînan.
Nî tarîxan gune kurdan de heyecanode girs pêda kerdenê.
Hama taye kurdî rîxmê honde rindekiye onca zî qeyta hevikê heyecan hîsnêkenê.
15ê Tebaxe yê serra 1984 de seweta xelesa kurdan qersuna virene, gama virene erjiye.
Taye kurdî naye rê bêveng û bêheyecan mendî. Seweta înan hona rew bî, qom hona “payra” nêbî û hona ‘zonayîsê’ xo çîne bî. Ya zî taye rêxistinanê siyasî yê kurdan besenêkerdenê pêrodê, vatenê ‘ma wazeme bi raya demokrasî heqanê xo bijerîme.’ Peyniyede remay, bî macur û Avrupa de heliyayî şî.
Kamo ke peyser mend, bî demokrat û kurdo rind yê kolonyalîstanê xo. Salon bi salon, rojname bi rojname, televîzyon bi televîzyon fetelînê, husku soynenê hereketê serbestiye, kolonyalîstanê xorê xizmete kenê.
19ê Temuze de kurdanê Rojavayê Kurdistanî welatê xo de, sazî û dezgê fermî kolonyalîstan dest ra guretî, xoseriya demokratîk nanê ro, kurdê rindî yê kolonyalîsatan naye rê zî sa nêbenê.
Kolan û kuçeyan nêvejînê, sanêbenê, govende nêcenê, poşt bi kurdanê Rojavayê Kurdistanî nêdanê. Heyecanê xo çîno, esqê serbestiye tey çîno, nêwazenê serbest bê. Mordemê bindest yê, na bindestenî cirê wes yena. Hama salonande ‘bijî Kurdistan’ qîrenê. Salonan de.
Kolonan û kuçeyan de niyadana, binê rayveriya BDP û KCD de seweta qomê Rojavayê Kurdistanî numayîsê poştdayene yenê virastene. Koyan û destanê Kurdîstan de zî gerîlla poşt dana Rojavayê Kurdîstanî.
Kurdê rindî yê kolonyalîstan zerrê xo de mirozin yê herhal, coka sanêbenê.
23ê Temuze (emser) gerîlla Şemzînan guret binê qontrolê xo, kurdanê rindan yê kolonyalîstan ra onca vengê sabiyayene nevejiya. Nî feqîrî hona pars kenê arê, xorê dewleta tirkî ra ‘federasyon’ wazene!!!
28 serrî gama virene ra tepiya gerîlla onca aynî ca de gamade tarîxiya bîne erzena, nutikê dewleta tirkî hona televzîyon bi televziyon fetelînê, dewlete ra
nêzon çi wazenê.

 ***
Endî beso! Nika tam waxt o: Sazî, dezge û rêxistinê ma gune endî tirkî weşiya xora vezê. Rojnamê ma gune pelganê tirkî kêmkerê, televziyonê ma programanê tirkî kêmkerê, siyasetvanê ma eskerakerdîsan bi zonanê kurdistanî bide.