Referandûmê 16ê Nîsane de Sîstemê Yewkesî sey weçînite yeno şarî ver. Babete ser o kurdê ke Ewropa de cuyenî, fikrê xo aşkere kerdî.

Mutlu Bîngol: Ez Gimgimê Mûşî ra ya û Mannheîm de cuyena. Reya mi dîyar a, ez do vaja nê. Ez do seba Sûr, Cizîr û aştîyêka rûmetin vaja nê. Ma bi embazanê xo reyde xebatanê ‘nê’yî meşnenî. Eke ma bihêz û rêxistinkerde bibî, ma eşkenî qezenç bikerî. 

Ubeyt Bendeş: Seba ‘nê’ zaf sedemê ma estî. Seba ke no sîstem antîdemokratîk o, ma do vajî nê. Ez veng dana heme hetanê demokratan, wa qetlîyamê Kurdistan de qewimîyenî rê vajî nê. 

Seba merdimîye ‘NÊ’

Îsmaîl Işik: Ganî ma vera nê sîstemo teberê merdimîye de vajî nê. Nê têkoşînê rûmet û şerefî yo. Ez seba ameyoxa merdimî, bawerî û kulturan vana nê. Ez veng dana her kesê ke xerîbîye de cuyenî; yê ke muhîmî danî ameyoxa ciwan, cinî, extîyar û tebîetî wa vajî nê.

Metîn Durak: Ez zî Darmstad de manena û vera zîhnîyetê tekperest, faşîzm û dîktatorî de vana nê. Ganî ma seba ameyoxa şarê xo şêrî sindoqan ser û vajî nê.

Arîf Dîrîk: Ez bajarê Almanya Frankfurtî de cuyena û ez do reya xo zî tîya de bixebetna. Seba vatişê nê xeylê sebebê mi estî. Sebebo yewin; ez dîktatorî nêwazena, yê dîyin ez kurd, elewî û kedkar a. Ez heme merdiman ra hes kena. Vera ti kesî de dişmenî nêkena. Reyna ez faşîzm zî Nazîzm zî baş şinasnena. Cok ra ez vana nê.

Yasemîn Cankayran: Ganî şarê ma yo ke Ewropa de cuyeno û bitaybetî zî cinîyî ganî vera cînayet, zext û tedayan de fikrê înan zelal bibo. Fikrê mi zelal o û ez vana nê. Eke ma cinîyî yewna rey nêwazî kişîyayîşê cinîyan bivînî, ganî ma nê rejîmî bivindarnî. 

Husne Demîrtaş: Ma kurdî bêhuqûqî û zulmê merdiman qebul nêkenî û rejîmê yew kesî nêwazenî. Bi tewqîfkerdişê sîyasetçîyanê ma nêşênî ma biqedênî. Cok ra ez do vaja nê.

Yildiz Can: Ez seba referandûmî veng dana şarê ma yo ke Ewropa, Kurdistan û Tirkîya de cuyeno, wa vajî nê.

Asîmîlasyonî rê nê 

Melîha Dogan: Ma sey kurdê Anatolyaya Mîyanên ameyî têhet û Almanya de xo rêxistine kerdo. Ma seba ke bişînbî asîmîlasyonî bivindarnî, nê platformî awan kerd. Ma zî sey PKANî vanî nê. 

Marûf Gurel: Ez zî kurdanê Anatolyaya Mîyanên ra. Ma do referandûm de vajî nê. Ez veng dana kurdê ke koç kerdî, wa vajî nê.

Omer Koyuncuer: Ez zî kurdanê Anatolyaya Mîyanên ra ya. Ez seba ke bişînba hesabê seserran bipersa, vana nê. 


ŞÎLAN PELŞÎN / ANF / BRUKSEL