Parîs de mîtîngêkî ame viraştiş
Roja serragêra qetlîamê Parîs’î de bi des hezaran kesî Parîs de amey têhet û qetlîam lenet kerdî. Nûmayişa ke bi slogana ‘Ma edaletî wazenî’ ver îstasyonê Gare Du Nord’î de destpa kerd, heta Meydanê Bastîlle dewam kerd. Meydanê Bastîlle de zî mitîngekê bi heybet ame viraştiş. Mitîngî de xoverdayişê Kurdistan ame silamkerdiş.
Fransa verra Kurdan bêveng a
Ser nameyê malbatê Sakîne Cansiz Haydar Cansiz hikumeta Fransa ra nîrazîbiyen mojna û niya va: „Veriya 3 serrî 3 cenî amey qetilkerdiş. Fransa hona zî bêveng a û ma na bêvengîya Fransa protesto kenî. Ma vanê gerek ma dustê nînan xoverdayişê xo hîna girdêr bikerê. Pî yê Fîdan Dogan Hasan Dogan’î zî ciresna ke Kurdî qetlîaman reyde, rî bi rî yê. Dogan’î vist vîrî ke badê qetlîama 9ê Çile, 2 qetlîamê bînî Fransa de viraziyayî û kiştoxê înan ca de amey diyayiş, la wexto ke dor yena Kurdan Fransa bêveng manena. Pî yê Leyla Şaylemez Cumalî Şaylemez’î zî ebi vîrardişê 3 cenîyan destpa qalîkerdişî kerd û wina vat: “Her çend ke 3 serrî vîyertî zî qetlîam nîna roşnkerdiş. Dozgerê dawa aşkere keno ke, heme şop-rêçê qetlîamî Enqera ra vejyenî. Ê zî zanê kiştoxî kamê, la serva ke ma Kurdî yê, 3 meymunan kay kenî. Ma dê hesabê ci bipersî.”
Mesaja TJK-E de zî qetlîam ra dewleta tirk mesûl amê giroten û persa, edaleta Fransa do heta key raştiyan binimno ame kerdin.
Hemseroka HDP Fîgen Yuksekdag zî hayr ant qetlîamê ke Kurdistan de, hetê qûwetanê dewlete ra yenî viraştiş û xoverdayîşo ke şarê Kurdî dustê nê qetlîaman nîşan dano ser.
DARMSTADT: Sûka Almanya Darmstadt de serva protestokerdişê cenîyê ke Parîs û Silopî de amey qetilkerdiş, bi rayverîna Meclîsê Cenîyan ê Roza de, standekî amê akerdiş.
HAGEN: Kurdê ke sûka Hagen yê Almanya de cuyenî bi rayverîna Dergahê Alewîyê Hagen’î de semedo ke qetlîamê Kurdistan’î protesto bikerî rayşiyîn û mitîng viraştî.
STUTTGART: Kurd û dostê Kurdan Stuttgartî zî are bî bi rayşiyîn qetlîamê dewleta tirk protesto kerdî.
VÎYANA: Paytextê Awusturya Vîyana de zî bi rayverîna Komeleyê Cenîyan ê AVESTA de, serva protestokerdişê 3 cenîyê ke Silopî de amey qetilkerdiş nûmayiş viraziya. Nûmayiş de sloganê zey ‘Terorîst Tirkîye’, ‘Bicuyî serwedartişê YPS’ amey qîrayîş.
BERN: Sûka Swîsre Bern de zî nûmayişê protestokerdin viraziyay. Çarçoweyê nûmayişan de stand akerdî û standî de vilavokan kerdî vila.
Kibris de qetlîamî lanet bî
Kurdê ke Kibris de cuwyenî zî semedê lanetkerdişê hêriş û qetlîamanê nikayî yê dewlet û qetlîamê Parîs’î eştî ser televîzyonê RIKe. Kurdî vernîya Temsîlkarîya Yewîya Awrûpa de amey têhet û qetlîaman lenet kerdî. Dima heyetê ke 3 tenan ra pê yena Temsîlakarîya Yewîya Ewropaye reyde pêvînayîşêkî viraşt û dosyaya ke qetlîyaman ser o hedre kerdbî pêşkêşî înan kerd. Bade semedo ke Qetlîyamê Parîsî şermizar bikerî amey vernîya Konsolosîya Fransaye û seba ke rayedarê konsolosîye pêvînayîşî qebul nêkerdî, çalakgerî tîya de çalakîya roniştişî viraştî. Çalakîya ra dima rayedarê konsolosîye heyetî qebul kerdî û pêvînayîş nêzdîyê yew saet dom kerd.
Qetlîamê Parîs û yê nikayî yê Kurdistan, Paytexta Danîmarka Kopenhag de, paytexta Fînlandiya Helsînkî de, paytexta Swêd Stockholm de, sûkanê Îtalya Roma, Pîsa û Torîno de zî protesto bî.
Bakûr, Başûr û Rojawayê Kurdistan de zî 3ê ceniyê Kurd bi nûmayişan amey vîrarden û qetlîamê dewletan protesto bî.
ANF/NAWENDÊ XEBERAN