Kurdistan de tayî estî, çîyê sosret kenî. La ayê ke çîyê sosret kenî û pawenî, wazenî çîyê sosret şarê kurd û tevgera azadî ra bidenê qebulkerdiş. Zafî estî teslîme neyaran bîye, wazenî şarê kurd û tevgera azadî zî teslîm bibo. Pêronê înan bin nameyê rexneya nê çîyan kenî. Wexto ke tevgera azadî, hembere ruhe înan yê teslîmkar vindena û înan rexne kena, eyê vanî, way PKK ma tehdît kena. Wexto ke yew nuştox û rojnameger zî înan rexne bikero, reyna vanî way, nayî ser nameyê PKK ma tehdît kerdî.
Yew ewnêno hişê ayê hina, gore hişê înan ti vanî qey Kurdistan hetê dewleta tirkî de nîameyo dagîrkerdiş. Ti vanî qey dewleta tirkî, kurdê elewî nîkiştî. Kurdê êzidî nîkiştî. Ti vanî qey dewleta tirkî wextê Şêx Seîd de komkiştiş nîkerdo. Dersim de komkiştiş nîviraşto. Ti vanî qey, AKP û dewleta tirkî serranê 1990an de Kurdistan vîran nîkerdo. Komkiştiş nîviraşto. Ti vanî qey, AKP û dewleta tirkî, Roboskî de komkiştiş nîviraşto. AKP û dewleta tirkî bajarê Kurdistan vîran nîkerdî. Cizîre Botan û Amed-Sûr de komkiştiş nîviraşto. Ti vanî qey dewleta tirkî, Rojavayê Kurdistan dagîr nîkerdo. Ar û hayê înan nîmendo, bîyê tîr û mertalê dewleta tirkî, dewleta tirkî ra yew qisey nîkenî, la hêrîşê şarê kurd û tevgera azadî kenî. La wexto ke yew cewabê înan dano, vanî hele biewnî ma senî tehdîtkenî. Çîyo ke vanî, pêronê înan zurîyê.
Wexto ke raştîya înan yena nîşandayîş, hawar û gazî kenî. Ayê ke hina kenî, peynî de raştîya înan zelal vejîyena werti. Neşkenî rîya xo raştî binimnenê. Hema hema pêronê înan dima ra raste rast şinî qerargeha AKP û dewleta tirkî de ca gênî. Hewca nîkeno yew nameyê înan zî bido. Çend kesî verê cû bibî, xo sey roşnvîr nîşandanê, wexto eyê ameyê rexnekerdiş, înan vati bi, PKK û hetkarê PKK ma tehdît kenî. Raştî de çîyêk hina çin bî. Qey (seba) dişmenî û neyarîya xo ya hembere şarê kurdî binimnenê hina hawar û gazî kerdênê. La dima ra bivazdayîş û vazdayîş şîyê qerargehê AKP û dewleta tirkî. Şîyê kewtî qerargehê JÎTEM’î.
Nika zî tayî bîn yê hina peyda bîyê. Dewleta tirk, Bakur, Başur û Rojavayê Kurdistanê de komkiştiş virazena. Şarê kurd û pawitoxê şarê kurdî, Kurd û Kurdistan pawenî. Eyê bi nameyê rexneyî vanî, rayîre sîyaset esto, şarê kurd û pawitoxê şarê kurdî çira şer kenî? Nê çîyan zî bi nameyê nuştox û roşnvîr kenî. La nêzanî eyê hetê AKP û dewleta tirkî de cabigêrenê, yew zî cewabê înan bido. Heftê bîn zî çîyo ke mi kerd, mi cewabê teslîmkaran da. Mi yew kes zî tehdît nîkerdo. Mi eşkera nuştibi, bena teslîmkarê teslîmê AKP û dewleta tirkî bibênê. La şarê kurd û têkoşerê şarê kurdî, teslîm nîbenî. Zanî zî sebikerenî. Yane mi eşkera vatibi do xoverdayîş bikerenê. Ayê ke teslîme AKP û dewleta tirkî bîyê, hina yew hewa virazenê vanî, ma ameyê tehdît kerdiş. Seba ke nameyê xo meşhur bikerenê hina kenî. Ez qey înan vana, şima xora rezîlî, xo zedeyîr rezîl mekerenê.