Vera hêrişê dagîrkerîye yê dewleta Tirk û çeteyanê ci de Kurdî xeylê cayan de raşteyan de yî û mesajê yewîya neteweyî danî. Temsîlkaranê partîyanê Kurdan zî nîşan da ke kesê sey Cegerxwîn, Ehmedê Xanî û Osman Sebrîyî zî qala yewîye kerdî û va ‘Kurdî seba yewîye amade yî’.
Vera hêrişanê dagîrkerîye yê dewleta Tirkî û çeteyanê ci de her ke şono reaksîyonî hîna zêdeyêr benî. Babete ser o partîyanê cîya-cîyayan yê Kurdan ra zî îzehetî dîyenî û bale ancîyeno yewîya neteweyî ya Kurdan ser.
Babete ser o Hetkara Serekê Pêroyî ya Partîya Merdim û Azadîye Menîce Gulmeze va ‘problemo tewr gird yê Kurdan yewîya neteweyî ya’ û wina dewam kerde: “Seba ke Kurdî zaf bihêz bibî, ganî yewîya xo awan bikerî. Wa fikir û rêxistinî menfîetanê xo ronî hetêk de û seba yewîya neteweyî hewl bidî. Heta ke ma parçebîyaye bibî, herkes eşkeno bi ma. Labelê eke Kurdîstan bibo yew, o wext her kes do hêzê Kurdan bivîno.”
Gulmeze dewamê qiseykerdişê xo de va ‘hêrişê dagîrkerîye yê vera Rojawanê Kurdîstanî de ame dîyayene ke yewîye çiqas muhîm a’ û wina domnaye: “Eke ma nebî yewe, o wext ma do zaf dejan biancî. Wexto ke hêrişî vera Rojawanê Kurdîstanî de bîyî, çar parçeyê Kurdîstan û Ewropa ra tewirî ameyî nîşandayene û Tirkîya mecbûr mende ke tepîya game bierzo. Ma mecbûr î ke bibî yewe. Eke ma nêbî yewe, ma do hertim parçe bimanî.”
Hemînan wina vatêne
Serekê Pêroyî yê Partîya Demokratî ya Kurdîstanî ya Tirkîya (PDK-T) Mehmet Emîn Kardaşî zî va ‘ganî seba yewîye fikir, sîyaset û vînayîşê înan cîya yî, bixebetyî. Seba naye zî ma rê dîyalog lazim o. Eke ma piştî bidî yewbînan û mîyanê ma de aştîye bibo, ma eşkenî bikerî. Xora eke şar nînan bivîno, o wext do şar zî bikewo dewre. Çimkî şar seba yewîye amade yo. Wa bêro zanayene ke dost kam o û dişmen kam o. Kurdîstan yê ma hemînan o û ganî no vatiş bêro esasgirewtene. Cegerxwînî vatêne ‘Eke şima nêbî yewe, şima do şêrî yew bi yew’, reyna Ehmedê Xanî û Osman Sebrîyî zî eynî çî vatêne. Ganî ma ewil hişê xo de bibî yew.”
AMED