‘Qetlîaman vindernê’
Qezaya Riha Sêwereg de welatijî seatanê şan yê Hîrêşeme de, Parqa Kanlikûyû de are bî. Sêweregijan qandê (serva) protestokerdişê qetlîamanê dewleta Tirk laçikê siya akerdî. Nûmayişkaran bi sloganan qetlîamê ke bi fermanê AKP Kurdistan de benê lanet kerdî. Nûmayiş de hemserokê HDP yê qeza Îbrahîm Ayyildiz’î qisey kerd û vist vîrî ke operasyonanê di aşmî de bi desan însanî amey kişten û bi seyanê ci zî kerdî dirbetin. Ayyildiz’î waşt ke dewlet desinde ‘qedexe’yanê vejyayişê kuçe û operasyonan biqedîno.
Dersim de zî seweta protestokerdişê qetlîamanê dewlet cuwyayiş vindiya. Vizêr sûk de esnafan çêberê dikanan nêkerdî a, şoföran kontak girotî. Sûk de bê eczane û firinan dikanî nêabiyay. Dersimijan ebi bêvengî û vindernayişê cuwyan qetlîamanê dewlet protesto kerdî.
Cew cayo ke veng da xoverdayişê Cizîr Amed bi. Amed de çarçoveyê qerarê vindernayişê cuwyan û girdkerdişê xoverdayiş’ yê 3 rojan vizêr zî esnafan kepeng nêkerd a, şoröran kontaq girot. Amedijî tenya serva merasîmê cenazeyê Mahmût Bûlak vejyay meydanan.
Her ca Cizîr her ca xoverdayiş
Sûka Colemerg ke sewqiyetê eskerî ramenê de zî vera polîtîkayanê qirkerdin yê AKP kepengî nêbiyay a. Welatijî bi slogananê paştdayenê xoverdayişê Cizîr û Sûr hetê midûriyeta emniyet, bana qeymeqamtî û lajmananê tîmanê taybet kewtî ray û nêrazîbiyen damusnay.
Sêrt de zî Êzidiyê ke Kampa Dudêran de manenê bi jû şiyayiş wehşeta vera Cizîr protesto kerdî. Herzewbîn şewa verî cayanê zey Mêrdîn, Dîlok, Erzêrom, Sêrt, Hatay û xeylê cayan de nûmayişê protestoyî viraziyay. Tenya Kurdistan de nê, teberê welat de zî nûmayişê protestoyî yê Kurdistanijan ramenê.
NAVENDÊ XEBERAN