Hêrişê ke vera Vakur û Rojawanê Sûrîye de hetê Tirkîya ra yenî kerdene roja 11. de yî. Reaksîyonê ke vera hêriş û dagîrkerîya dewleta Tirkî de dîyenî zî her ke şono zêde benî. Parlamentera HDPyî ya Mêrdînî Ebrû Gunaye babete ser o ajansê Jinnewsî rê qisey kerde.

Gunaye daye zanayene ke AKP partîya ke şer û pêrodayîşan ra miqate bena ya û wina va: “Projeyêkê AKPyî ke komel de aştîye û huzûr awan bikero, çin o. AKP tena şêno ser şerî ra xo bipawo. No zî nîşan dano ke AKP nêşêno nê welatî îdare bikero. Hêrişê peyênî vera Kurdan de dîyayî destpêkerdene. Selahîyetdarê AKPyî seba ke reaskîyonê Kurdan nizm bikerî, vatişanê sey ‘Kurdan de problemêkê ma çin o’ û sewbîna kenî.”

Gunaye qala rolê Rayberê Şarê Kurdî Abdullah Ocalanî yê çareserkerdişê probleman de kerde û wina va: “Hende çîyê negatîfî estî zî Birêz Ocalan xeta xo ya aştîye paweno. Eke na cografya de çareserîyêk bibo o zî bi Birêz Ocalanî mumkin o. Birêz Ocalanî hende seba aştîye veng da, labelê AKPyî şer tercîh kerd. Birêz Ocalan hetê aştîye ra qet tavîzan nêdano, labelê çi heyf ke hukmatê AKPyî şerî tercîh kerd.”

Dinya êdî nêwazena biba hemparê sucanê Erdoganî

Gunaye qala tewirê partîyanê CHP û İYİ partî zî kerde wina va: “Nê her di partîyî bi polîtîkayanê xo destek danî îqtîdarê AKPyî. Dişmenîye û hêrişkarîya AKPyî de rolê nê her di partîyan zî esto. Hukmatê AKP nêşêno hîna zaf nê komelî bi şerî îdare bikero. Dinya êdî polîtîkayanê şerî yê AKPyî qebul nêkena û nêwazena ke biba hemparê sucanê şerî. Kurdî ancax bi yewîya neteweyî qezenç kenî, çare yewîya Kurdan o.”

 

MÊRDÎN

 
 

3 şaredarîyê bînî zî ameyî xespkerdene

 

Çend rojî verê Hemserekê Şaredarîya Nisêbîn û Geverî ameybî tepiştene û dima ra hetê mehkeme ra tewqîf bîbî. Nika herinda înan de qayûm tayîn bîyî û şaredarîya Nisêbîn, Colemêrg Geverî zî hetê îqtîdarê AKP û MHPyî ra ameyî xespkerdene. Qezaya Nisêbînî ya Mêrdînî de 15ê Teşrîna Verêne de hemşaredarê Nisêbînî Semîre Nêrgîze, Ferhat Kût û Endamê Meclîsê Şaredarîye Mehmet Emîn Alkan, Hemserekê Şaredarîya Geverî Cîhan Remzîye Yaşar, Îrfan Yaşar û Hemserekê Şaredarîya Colemêrgî Cîhan Karaman ameybî tepiştene. Nînan ra Alkan serbest veradîyabi, Kût û Nergîze zî bi îdîaya ‘endamê rêxistine bîyayene’ ra tewqîf bîbî.

Reyna Karaman, Sari û Yaşar zî bi ‘endamê rêxistine bîyayene’ û ‘propogandaya rêxistine kerdene’ ra ameyî tewqîfbîyayene. Her 3 şaredarîyî zî ameyî xespkerdene û qayûmê tayîn bîyî. Seke yeno zanayene 19ê Tebaxe de şaredarîyê bajaranê girdan ê HDPyî yê Amed, Wan û Mêrdînî ameybî xespkerdene û qayûm tayînê nê şaredarîyan bîbî. Dima ra zî şaredarîyê Gogsî û Pasûrî ameybî xespkerdene.

 

AMED