Hemserekîya Konseyê Caardişî yê KCKyî serrgêra 81. ya îdambîyayîşê Seyîd Riza û embazanê ci de vato ‘ma Seyîd Riza û embazanê ci bihurmet yad kenî’ û wina domnayo: “Heta ke Kurdistano Azad û Dêrsimo Azad ronîyenî, ma do têkoşînê xo bidomnî. Wa kurdî şopa nê pîran de şirê.”
Hemserekîya Konseyê Caardişî yê KCKyî seba bi vîrardişê Seyîd Riza û embazanê ci yê ke 15ê Teşrîna peyêna 1937î de ameybî îdamkerdene û emser serrgêra 81. ya îdambîyayîşê înan o, îzehetêko nuştekîye daye.
KCKyî îzehetê xo de vato ‘nê îdamî sey sembolê qirkerdişê Dêrsimî ameyê bicaardene’ û wina domnayo: “Waşto ke vajo êyê ke nasname, ziwan û kulturê xo ca nêverdanê û nêbenê tirk peynîya înan îdam o. Nê îdamî seba pelexnayîş û bêvengkerdişê dêrsimijan ameyê bicaardene. Vatê kesê ke nêbenê medenî yanî kesê ke nêbenê tirk heqê înan ê ciwîyayîşî çin o.”
KCKyî îzehetê xo de bale anto qirkerdişan ser û wina dewam kerdo: “Bi xeylî dokumananê ke aîdê verê serra 1937î yê, ameyo îspatkerdene ke qirkerdişê Dêrsimî biplan ameyo bicaardene. Veşnayîşê pirdêk sey bahaneyê serewedartişî ercnayîş ramojneno ke plan zaf verî ra ameyo hadrekerdene. Qirkerdişî de cinî, doman, ciwan û kokimî zî tede bi des hezaran kesî ameyî kiştene, bi des hezaran zî ameyî surgunkerdene. Xorînî û tesîrê şiwareyanê ke şarê Dêrsimî dimayê 1938î ra vatê bi temamî qirkerdişî ramojnenê. Eke biheq no qirkerdiş bêro muhakemekerdene do dewleta tirkî sey dewletêk ke qirkerdiş kerdo, kursîya versûcan de ronişo.”
Têgêrayîşê Seyîd Rizayî do bibo têgêrayîşê heme kurdan
Hemserekîye dewamê îzehetî de wina vatî: “Eke ma ewro eşkenê qalê şarêk ke Dêrsim de bi kurmanckî û kirmanckî qisey keno bikerê, no bi xatirê têkoşîno ke serranê 1970an de ameyo dayene yo. Çîyê ke Seyîd Rizayî sêpaya îdamî de vatî, seba heme şarê Kurdistanî herinda dersêk de yê. Şarê kurdî do sey Seyîd Rizayî hemverê qirkerdoxan de vejîyo û serre nêno ro.”
Ma do hesreta îna bica bîyarê
Hemserekîye peynîya îzehetî de wina vato: “Sere de ciwanê kurdan heme dêrsimijî û şarê Kurdistanî seba ke pîrê înan ê winayênî estê, sereberz ê. Atakan Mahîrî, Şîyarî, Dr. Baranî, Çetînî, Baran Dêrsimî, Medenîyî, Îsayî, Kemalî, Sarayî, Zîlanî, Sorxwînî, Rozayî û bi hezaran şehîdanê ma bingeyê pêgirewtebîyayîşî de mucadele da. Heta ke Kurdistano Azad û Dêrsimo Azad ronîyenî, ma do têkoşînê xo dewam bikerî. Ma veng danî ciwan û şarê Kurdistanî ke wa serrgêra 81. şopa nê pîran de şirê; ma newe ra sozê bicaardişê hesreta înan danê. ”
ANF / BEHDÎNAN