Çeteyanê AKP qezaya Wan Artemêtan de vizêr nê perey eşt jew keyeyê 2 qatinî ser û komkişten viraşt. Çeteyan, 12 gencê ke keye de bî, înfaz kerdî û peycoy zî zî cenazeyê înan eştî parqî. Goreyê şahîdan, bê jew gencî, ê bînan pêrokînan serreyê xo ra gule werdo.
Bê ke anons bikerê hêriş kerdî
Cenazeyê 12 gencan verî hewadiyay Merkezê Tipa Dursun Odabaşi ê Unîversîteyê Wan. Bado zî bi îdiayê ‘tîvarî’ cenazey berdî Tipa Edlî ê Meletî. Emrê 12 kesê ke amey înfazkerdin, mabenê 18 û 25’î de yê. Quwetanê dewlet no înfaz zî qebûl kerd. Tîmanê Taybet hesabê xoyê Twîtter ra bi enê vatenan înfaz qebûl kerd: Ma senî Wan de, 12 Kurdî înfaz kerdî, nika ra tepiya ma dê her Kurdê ke bigîrê binê çiman, gule viradê sereyê ci û bikişê. Ena komkiştena dewleta Tirk bî sebebê hêrsê girdî. Parlementerê HDP ê Wan’î Lezgîn Botan’î derheqê komkiştenî de banê DBP ver de damûsnayin da û aşkere kerd ke bê ke anons bikerê, polîsan eşto keyî ser û 12 gencî înfaz kerdê.
Hesabê qetlîaman do pers bibo
Vizêr Wan û qezayanê ci de, vera komkiştenî cuyayiş vindiya, dikanî nêabiyay. Welatijî Meydanhe Beşyol de are bî û înfaz rê nêrazîbiyen damûsnay. Nûmayişê ke amey viraşten de, sozê perskerdinê hesabê komkişteni amey dayen.
Qezaya Wan Seray de zî bi seyan kes ver bana DBP de are bî û qetlîamanê AKP lanet kerdî. Qezaya Qerqelî yê Wan de zî vizêr nûmayişê protestoyî viraziya. Bi seyan welatijê ke Ceddeyê Îstasyon de are bî sloganê “zextî nêşkenê ma bişikînê” day. Colemerg û Gever de kî înfaz amê protestokerdin.
Înfazê 12 gencan hetê Federasyonê Komeleyê Gencanê Sosyalîst zî ame lanetkerdin. Azayê SGDF yê Dîlok Parqa Yeşîlsû de amey pêhet û mesajê perskerdişê hesabê qetlîaman day.
DÎHA/WAN