Kurdistan açarniya renga spî

Aldûş de koyî açarniyay spî

Qezayê Semsûr Aldûş (Gerger) de roja sifte yê aşma Kanûnî de vewr varî. Koyê Aldûş û cayê berzî açarniyay rengê spî. Badê varena şilî-yaxer, varina vewr dest kerd ci û cayê berzî bî spî. Cayê berz yê zey Kurdek, Girê Pîran û koyanê berz de heta 10 cm. vewr varî. Bi varîna vewr Aldûş rê zimistan ame. 

Sêwereg de vewra sifte varî û weşînê welatijan vist zehmetî 

Qezayê Riha Sêwereg de zî veriya didi rojan varîna vewr destpa kerd. Vewr dew û dewekanê herema Qerejdax yê qeza de varî. Netîceyê varîna vewr de her ca bi spî. Vewr bî sebebê zehmetînê weşîna welatijan. Trafîkî de zehmetî anciyayî. La qeçek-doman û tûrîstî rîwalê varîna vewr kêfweş bî. 

Dersim de rayê dewî girotiyay

Dersim û qezayanê ci de, 2-3 rojiyo vewr varena. Bi sebebê vewrî rayê 29 dewan şiyayin û ameyin rê biriyayî û elektrîkê 41 dewan zî biriyayî. 

Sûkê Serhed zî bin tesîrê vewr de mendî

Bedlîs, Mûş, Colemerg û xeylê cayanê bînan ê Serhed'î de jî, 3-4 rojiyo vewr varena. Bi sebebê vewra zafî, rayê bi seyan dewan biriyayî. Eynî wext de vewra vêşî bî sebebê birnayinê ceyranê bi seyan dewan. Wan de jî vewra zaf, raya 343 dewan birna. Ekîbê şaredarînê Wan'î serva-semedê akerdinê rayan, xebatan ramenê. Vewra vêşî qezayê Wan Elbaq û qezayê Colemerg Gever jî, açarna spî. Herzewbîn vewr bena sebebê qezayanê trafîkî jî. Agirî û xeylê qezayanê ci de rîwalê vewr rayê 202 dewan girotiya. Qezayê Agirî Giyadîn de jû wesaît ray ra vejiyê. Kesê wesaît de qezayî ra bê ke bibê dirbetin xelesiyayî. Sermiyanê meteorolojî vera îxtimalê qezayan, şofêran aya kerd û waşt ke hesas hereket bikerê.   

 NAVENDÊ XEBERAN