Qezaya Şirnex Cizîr de ablûqeya dewlet roja 9. de ramena. Verra qeza bombevaran û êrişî dewam kenê. Verra êrişan Cizîra Botan ser pay de ya.
Çeteyê AKP hewl danê ke keyeyan veng bikê û welatijan bidê goçkerdin. Êrişî teybetî verra mehleyanê Yafes, Sûr, Cûdî û Nûr viraziyenê. Mehleya Cûdî, tepeyê Caferî de, eskerî bi zorî welatijan keyeyanê xo ra vejnenê û nê keyeyan xo tê kenê zey qerargah. Vizêr qûwetê dewlet bi tanqan kewtî mehleyan û topvaran kerdî. Netîce de xeylê keye û mektebî rijiyay. Mehleya Cûdî de tanqan ra anonsê ‘sûk terk bikerê’ ame kerdin.
6 hetan ra nûmayiş
Mehleya Yafes de jû teyareyoka drone amê visten. Herzewbîn 3 wesayîtê zirxî netîceyê roketeştin de amey derbkerdin.
Rixmê nê êriş û herbê dewlet şarê Cizîr cayanê xo terk nêkeno û xover dano. Vizêr seatanê sodir ra, bi hezaran kesan verê xo day hetê Cizîr û Sîlopî. Welatijê ke navendê Şirnex, Qileban, Bêşebap, Roboskî, Dêrgûl û Hezex de kepengî nêakerdî, 6 hetan ra vejiyay meydanan bi sloganê “Kiştoş Erdogan”, “Bicuwe xoverdayişê Cizîr û Sîlopî” destpa rayşiyîn kerdî.
Polîsan bi bombeyanê gaz û bi guleyanê raşt êrişê welatijan kerd. Welatijan çarçoveyê xo pawiten de cewab da polîsan. Pirodayişî vilayê pêrokîn sûk bî.
Sîlopî de xoverdayiş beno hera
Sîlopya de zî welatijî verra konseptê herb yê topyekûn xover danê. Mehleyanê Cûdî, Nûh, Başak, Barbaros, Şehît Harûn, Yenîşehîr, Yeşîltepe, Karşiyaka û Cumhûriyet de, şar verra êrişanê dewlet xover dano.
“Şima ra nêtersemê”
Sîlopijî verra zûriyanê dewlet vanê: “Ma tiya de yê. Pey barîqatan de pawitene xo gênê. Tanq û teyareyanê şima ra nêterseme. Ma dê heta peynî xover bidê.” Welatijî zûriyanê çapemeniya hetkar rê nêrazîbiyen damûsnenê û ardî ziwan ke, Sîlopya de, sivîl û domanî amey kişten.
DÎHA/ŞIRNEX