Operasîyonê îşgal û venkerdişê Kurdistanî êy dewleta tirke dewam kenê. Dewanê herema Licê,Karaz, Hezro, Pasor û Hênêya Amede de aşma Gulane ra na heta qedexeyê tebervecîyayişî yeno îlankerdene. Dewleta tirke bi nêy kerdenanê xo reyna hewl dana ke dewanê hereme veng bikero. Na ra 3 rocîy raver zî reyna 37 dew û mezrayanê hereme de qedexeyê tebervecîyayişî amebi îlankerdene û operasîyonê eskerî amebi destpêkerdene. Operasîyonê eskerî dewanê Peşekevir, Koçeran, Ber Çiya, Speyni û Çeme Elika de yenê domnayene.
Nika zî eskerê artêşa tirke, heremanê qedexeyan de verva dewican ambargoya erzaqî pêk anê. Di noktayanê Kontrolî de eskerê artêşa tirke dest danê erzaqanê dewican ser. Erzaqêy ke dewicîy seba zimistanî genê û benê dewan,yenê desteserkerdiş. Eskeran reyde rayirber û xebatkarê DEDAŞ‘î zî dewan de geyrenê û bi mehneyo ke eletrîke qaçax a ro dewican maberê 500 panot û 10 hezarîy de ro dewican cezayan birrnenê.
AMED