Ewro 34. serraçarnayinê destcikerdinê xoverdayişê grewê veyşanîn ê 14'ê Tîrmeh o. Çend gencê ke Zîndanê Amedî de bi slogana “Xoverdayiş Ciwîyayiş o” dûştê faşîzmî xover day Tekoşînê Serbestî yê Kurdan ardî na merhale.
Kadroyanê rayver ê PKK ra Mehmet Xeyrî Dûrmûş, Kemal Pîr, Alî Çiçek û Akîf Yilmaz, 14ê Tîrmeha 1982 de, girotxaneyê Amedî de, vera wehşetê cûntaya 12'ê Îlon dest bi Rojeyê Merdişî kerd.
Waştî kurdbîyayiş ra poşman bikerê
Rayverîna cûntaya 12'ê Îlon, qandê şikînayişê îradeyê şoreşgeranê PKK kewtibî miyanê hereketî. Serva ke bireso hedefê xo zî, girotxaneyê Amedî, zey cayê esasî weçînabi. Rejîmê faşîst, serva wastenê ci bêrê ca, heme rayê êşkence vistî dewre. Wast, bi êşkenceyan tepişteyan kurdbîyayiş û PKKbîyayiş ra poşman bikero. Rayverîna cûnta qandê na wastenê ci bêro ca zî, cellad û kesê taybet rîştîbî girotxaneyê Amedî. Cûnta wast ke bi heme rayanê êşkence omidê serbestî ke, mabêna serranê 1970 û 1980 de bibê berz, şexsê giroteyan de, werte ra hewado.
Verra sîyaseta înkar qerarê tarîxî
La belê rayveranê PKK, bi xoverdayişê zindanan na wasten qirika rayverîna cûnta de terna û bi nûmayişê Rojeyê Merdişî, tarîxê xoverdayişê Kurdistanî de, rîpela newî akerdî. Tepişteyanê PKK ê Girotxaneyê Amedî de, vera êrişanê rejîmê derbeya 12ê Îlon û siyaseta înkar û îmhayî qerarê tarîxî da. Azayê Komîteyê Rayverîn ê PKK Mehmet Hayrî Dûrmuş, roniştişê dawa yê 14ê Tîrmeha 1982 de, eleqe ant êşkence û kerdenanê dûştê merdimî ser û qerarê xoverdayişê Rojeyê Merdişî beyan kerd. Badê Dûrmûş, Kemal Pîr, Akîf Yilmaz, Alî Çîçek, Mûstafa Karasû, Fûat Çavgûn, Alî Kiliç, Bedrettîn Kavak û Hamît Kankiliç zî tewrê nûmayiş bî.
Polîtîkayê teslîmgirotişî pûç vejyay
Badê na aşkerekerdiş nûmayişkaran ganê xo roj bi roj vilêşnay û polîtîkayanê teslîmgirotiş û şikitişê îrade veng (tol) vetî. Netîceyê nûmayiş de, Kemal Pîr 7ê Îlon, Mehmet Hayrî Dûrmûş 12ê Îlon, Akîf Yilmaz 15ê Îlon û Alî Çîçek zî 17ê Îlon de weşîya xo kerdî vinî. Nê şoreşgeran bi na nûmayişa xo tarîxê xoverdayişê Kurdistanî de, jû rîpela newî akerd.
Rayveranê xoverdayişê 14ê Tîrmeh ra Mehmet Hayrî Dûrmûş wastbi ke, kerraya mezelê ey sero vatişa 'Deyndarê şarê xo bi’ bîro nusten. Şarê Kurd zî na vatena Mehmet Hayrî Dûrmûşî, zey mesaja berzkerdişê têkoşînî fam kerd. Nika bi hezaran cenî, camêrd û gencê kurd ke wesîyet û mîrasê xoverdayişê Şehîdanê 14ê Tîrmeh dewr girotî serva serbestî, demokrasî û têdûştî danê piro, Kurdistan gam bi gam kolonyalîzmê serdestan ra xelesnenê.
NAVENDÊ XEBERAN
Wext wextê ser faşîzmî ra şîyayiş o
Komîteyê Rayverîn yê PKK derheqê xoverdayişê 14ê Tîrmehî de damûstayîn da û va ‘wext bi rihê xoverdayişê 14ê Tîrmeh ser faşîzmî şîyayiş o. Wextê, raya Xeyrî û Kemalan de rêxistinbîyayiş û ser faşîzmî ra şîyayiş o. PKK aşkere kerd ke serkewtiş do yê şaran û xoverdayoxan bo.
Waştî Kurdistan mehkûmê taritî bikerê
Damûstayîna PKK bi yadkerdişê şehîdanê Rojeyê Merdişî destpa kerd. Komîteyê Rayverîn vist vîrî ke nûmayişê ke tarîx virazenê estê. Bîyayiş û qehremanê ke tarîx rê ray damûsnenê û şekil danê estê. PKK va tarîxê ma de zî vejyayişê 14ê Tîrmeh nûmayişekê winayîn o û hayr ant şert û mercanê o demî ser: “Cûntaya faşîst ya 12ê Îlon pêrokîn noqteyê xoverdayişî vilakerdbî. Kurdistan û Tirkîye taritî de verda bî. Êriş pir bi hera û giran bi. Hedef kerdî ke Kurdistana ke yena xo ser reyna mehkûmê beton û taritî bikerê. Xêlê kadro û mîlîtanê PKK girotîyaybî û erzîyaybî zîndanan. Generalê ke teber de civakî piloxnay verê xo çarnay girotxaneyan.”
Qanûnê xo zî vistî bin lingan
Komîteyê Rayverîn yê PKK da zanayiş ke cûntaya faşîst bi nameyê çep, sosyalîzm û kurdatî çi estbi hedef girotibi ke werte ra wedarnê û wina va: “Rîwalo ke biresê no hedefê xo îşkence û wehşeto ke nîno aqilê merdimî kerdî. Pêrokîn ercîyayeyê însanî vistibî bin lingan û qanûnê xo yê eskerî yê faşîstîn kî hinî nêsilasnay. Polîtîkayanê bêkesayetîkerdiş, teşwîqê îxanet û îtîrafkerdişî ferz kerdî. Vervejyayiş û xoverdayiş bê netîce mend. Zîndanê Amed çarnîya cayê îmtihanê însanbîyayen û şoreşgerbîyayen. Destê tepişteyan de bê bedehê ci tifingekê bîn ke vejerê werte çinêbî.”
Merdişê tewr giran weçînay
Komîteyê Rayverîn yê PKK vist vîrî ke rîwalê peynîardişê wehşet û îxanet Mazlûm Doganî 21ê Adar 1982 de peynîya weşîya xo ard û wina va: “Peycoy 18ê Gulan de Çehar’an bedenê xo da ver adir. Faşîzm û îxanetî rê derbe ser derbe amê. Derbeya peynî zî Rojeyê Merdişî yê 14ê Tîrmeh da piro. Bin nêkewtişê îradeyê însanan fina îspat bî. M. Xeyrî Dûrmûş. Kemal Pîr, Akîf Yilmaz û Alî Çîçek destpa Roceyê Merdişî yê 14ê Tîrmeh kerd. Merdişê tewr zehmet, tewr giran rê roj bi roj, seat bi seat bi velişnayiş vatî ser sere û çimanê ma. Bi na nûmayiş zorvajî û îxanet amê derbekerden.”
Serkewtiş yê xoverdayoxan o
PKK vist vîrî ke hikûmeta nîjadperwer yê tirk ewro zî emelanê xo yê faşîstîn ser Kurdistan de ferz kena û va, îradeyê PKK yê çewres serran ke taritîyê zîndanan de teslîm nêame girotew ewro zî teslîm nîno giroten. Damûstayîn de vajîya ke xoverdayişê şarê Kurdistan ewro vilayê çehar leteyê Kurdistan bîyo, bi mîlyonan însan, cenî û camêrd zerreyê xoverdayişî de yê.
Komîteyê Rayverîn aşkere kerd ke hikûmeta AKP û gelenega cî ya nîjadperest do qedîyayiş ra nêreyno. Damûstayîna PKK bi vatenanê “Wext wextê, raya Xeyrî û Kemalan de rêxistinbîyayiş û ser faşîzmî ra şîyayiş o. Serkewtiş do yê şaranê ma û xoverdayoxan bo” qedîya.
ANF/BEHDÎNAN