Badê çar rocan merdimêko binê çimandewo lazim o vecê dadgeh/mehkema. Nê çar rocan de zî parêzer şino merdimê binê çimandewo verê cê, tedir kuno diyalox yê bine çimandeyê şexsê. Yeno vatiş derheqê yine de verpersîyêk esta.
Ma teqîb kenê ke çiyêk yine çinêbo mawo beradîme. Herî zêde çar rojî. Ceyran, nan û awe esta.
La Farqîn de no des rocî rewş çi wo, merdimê nê taxan de niştecihê nê malbatî çi hal de yê, nêzanê. Nêverdenê ti kes şêro halê yine pers kero. Sewtê çeke giranan yeno. Heşt rojî de şeş merdimê sivîlî amey qetilkerdiş. Hende kesan zêdêrî zî birîndar î. Roja heştin taxêkê qedexe serowo ewca ra teber qehwa de yew kişt, hîrê kesî zî birîndar kerdî. Hende merdimî amey qetilkerdiş û birîndarî estî, hesab nîno dayiş.
Zerê nê taxan de wehşet virazyawo. Bi gulê topan banan xerepnenê. Şew û roj sewtê sîlahanê giranan yeno. Nê taxan de heme emir ra merdimi cuyenê.
Doman, ciwan, cenî, camêrd weş- nêweş, kal û pîr. Roca ke qedexe dest pêkerdo heta ewro ceyran birnawo. Bajaran de heme çiy rojane wo. Bi ceyranîya giredayo. Gama ceyran çinêbo awe zî çinya. Awe çinêbo cuye vindeno.
Mebûsê Amedî Zîya PÎR vano : “Min yew verpersîra persayo, şima wazen se kerê? Verpersê cê: “Ma nê hîrê taxan xerîte ra wedarenê.” Nê vatişî ser çi verpersîyêk hetê dadger û dozgerî ra nêyame perskerdiş. 7’ê Hezîrane ra heta ewro bi seyan kesî bi çekanê leşker û polîsan amewî qetilkerdiş, ti kesî ra hesab nêameyo perskerdiş.
Ma rocê ewnayinan ra vêrenê ra. Tena Farqîn nê, Sûr, Cizîr, Gever, Nisêbîn, Gimgim û cay bînî. Rayna hesabê teqyayîşê mitîngê Amed, Pirsûs û Enqera hende merdim amey qetilkerdiş kamî kamî ra hesab persa. Kamî hesab da.
Vanê; merdimêk waşto şêro dewêk. La demser zimistan bîyo. Erdo vewre çinêbiya, qeşabîyo qeşa de erd cemedyeno. Heme çiy erd ra zeleqyeno. Zey betonî. Kutikê/sipê na dewe bibiye. Kutikê yine yenê merdimi. Kutikê harê. Merdim destveng o. Semed muhafzê xo awneno erd ra kerray/siy est ê. Beno kerra ro berzo kutikan la kerra erdî ra zelqxnaya.
Kerra erd ra nêbena. Nêşkeno kerra wedaro. Vendeno, vano: “Haho û haho, na çi dewa!” Kutikê xo vera day, kerrayê xo gire dayî.”
Ewro no welat de çiyêko qewemyeno ma vînenê. Her roja homay çinya ke merdim nêro qetilkerdiş. Yê qetil kenê yew yine ra nîno tepiştiş. La her roj kam nê zulmî heqaretî vaco, binûso derheqê cê de cipersayîş dest pêkena. Dekenê zîndanan. Wextêk meşan de dûrişmêke amey qîrekerdiş vatê: “Bêveng meman, ti bêveng bimanê go rojêk dewr bêro to.” Ewro ameya a roj.
Nesîp GULTEKÎN