‘Lajê mi sey nameyê xo egîd bi

Endamê YPSyî Dijwar Şîyar (Şîyar Tarlak) Newroza 1992î yê Nisêbînî ra çend rojî ver amebî dinya û sînorê Rojawanî de hetê hêzê dewleta tirk ra amebî qetilkerdiş. Şîyarî mîyanê keyeyêko welatperwer de amebî dinya û 9 waye û birayê ci estbî. Dayîka Dijwar Şîyarî Dilşa Tarlake (55) qala xoverdayîş û hîkayeya lajê xo kerde.

Tarlake qiseykerdişê xo de va ‘lajê mi sey nameyê xo bî’ û wina domnaye: “Zaf hetê lajê mi cîya bîy; her tim huyayêne. Zay girêdayeyê keye û embazanê xo bî. Lajê mi seba ke polîtîkayê asîmîlasyonî qebul nêkerd, mekteb ra fek verada û beşdarê xebatanê ciwanan bî. Her çiqas ke waştîya lajê mi bîye zî lajê mi ewil aşiqê welatê xo bî. Dijwar xoverdayîşê Nisêbînî de ame tepiştiş û 2 serran Hepisxaneyê Tîpa E yê Mêrdînî de mend. Embazanê Dijwarî ci ra zaf heskerdêne. Badê ke Dijwar hepisxane ra vejîya wextê leşkerîya ci amebî. Her çîqas ke ma seba veyve û leşkerî israr kerd zî Dijwarî dîyayîşê rewşa Nisêbînî ra dima tercîhê xo kerd û şî.”

Ma do zî  layîqê rayîrê lajê xo bî

Tarlake qiseykerdişê xo de va ‘pîyê lajê mi xo resna Dijwarî, la Dijwar reyna zî nêame keye û waştîya xo het’ û wina dewam kerde: “Lajê mi rayîrê şeref û namusî tercîh kerd. Şîyarî her çî ra ver girêdayeyê erd û têkoşînê xo bî. Nisêbîn ra fek veranêda û heta pêynî azadîya Nisêbînî pawit. Ma şehadetanê 17 kesan û yê lajê xo televîzyon de pêhesîyayî. 18 kesî wexto ke sînor ra vîyarenî, hêzê dewleta tirk hêrişê înan kenî û înan qetil kenî. Dima ra ma dî ke fotograf û nameyê lajê mi kewto înternet ser. Şîyar rayîrê heqîqetî de şî. Lajê mi xo fedayê têkoşînî kerd, ma zî do taqîpkar û layîqê rayîrê lajê xo bî.”