Lazimo baş bêro nîqaşkerdiş. Sebeb çi bîy? Kêmasî ma çi bîy?. Ma çica xeletî kerd? Ma senin kewtî kêmasî? Lazimo ma zehf sero vinderime.
Tera sey/ders bigerime. Sedemî tenê yew nê, yewra zêdêrîyê. Merdim eşkeno rêz bikero. Bade weçînayişê ewilî zehf embazê ma yê verpersî amey girewtişî.
Tewqîf kerdî. Miyane nê kesan de serek şaredarê ma estê. Endamê meclîsê şaredarîy estî. Rayverê partî estî. Ciwanê meclîsê taxan estî.
Hûmar risena nizdîy di henzarî kes. Pêro niyamey tewqîfkerdiş. La girewtî binê çiman çimtersî kerdî. Qismêk çim tersîy bîy zî. Serek şaredarê ma û endamê meclîsê şaredarîy peywir-ra amey girewtişîy. Hêrişê ardî sazîyê ma ser. Însanê ma yêku teberê Kurdistanî de cuyen hêrişî berdî yine ser. Cayê karê yine vêşnay.
Derb kerdî. Karkerêku teberê Kurdistanî de xebetyê zulm û teda dîy. Nê pêroy ma dîy û vîna. Ma cuyay. Qetlîamê Pirsûs û Enqere. Nê pêroy amey/ardî ma sere. Ma eşkay nê ecêbêko amey/ardî ma sere ma bi civatê Kurdistanî û Tirkiyaye bidim fehmkerdiş? Nê ecêbî pêro hukimetê AKPe kerd/ardîy ma sere. Badê nê kirinanê xo zî rayê xo heme hetîy ra zî zêdnay. Vatişê verînan esta vanê; “Ez nêverdena ti bibermê zîy”. Yê ma bermayiş nê la ma nêşkay mexdûrîyetîya xo bi şarê xo bidim fehmkerdiş.
Welatêke de hend zilm û zordarîy virazyo şoriş pêk yeno. La tiya yêko kerd cirê mend. Tenê cirê nêmend, pêy xo bi hêz û qewet kerd.
Kirinê xo bi şarî da qebul kerdiş. Ame erê kerdiş. Ma nêşkay zulm û tedayêka ro ma biya şarê xora vajime. Cayêko şarê ma yew bi yew zulm dîy, bi desan cenazey ciwananê xo wederd, cayê zey Gimgim, Farqîn, Sûr, Cizîr, Gewer duşt nê zulmî çare cêy/cînan berz, xo ver da. Rayê xo nêda zulumkeran.
La cayê binan. Lazimo ma pêro serê xo bikerime xo ver bifikiryime. Ma sekerd? Ma çica kewtî kêmasî? Lazim be mawo sekerdime?
La ewil şexsê xo de. Dimera sazîyê ma tede ca genê girewto pêro teydir bigerime verçiman rexnedayinê xo bidim. Rexne bikerime. Rêxistinîyanê xo verçiman ra derbas bikerim e. Kêmasiyanê xo wertera wedarime.
Newera xo birêxistin bikerime. “Tenê bi rêxistinbiyayiş ma bene hêz. Tenê xelasî rêxistinî da. Dîrok/tarîx çiftlikê qralan û generalan niyo, erdê/hêgê şarî/miletiyo.” “Her miletî vextê xo de no hêga de çi ramito go yê biçîno”. Sewtê wijdanî temamê qanûnan ra berzêrîyo.
Lazimo ma wijdanen rehetbime. Karê xo baş û raşt bikerim e. Beso no zilm! Hz. Mûsay venda Îsraîlijan vat; “Bêrê raya raşt ser. Yine vat; belê Mûsa ti heqdarî la bi sayê Fîrewnî pîzê ma mird beno”.
Nesîp GULTEKÎN