Fîncanci dîyar kerd ke semeda ke qirkerdişê Roboskî nêameyo cezakerdiş, qirkerdişê bînan rê rayîr ameyo akerdiş.
Bedel xeylê giran o
Fîncanci dergeyîya qalîkerdişê xo de ciresna ke bombekerdişê sîvîlêy bê gune çîyo ke bêro qebulkerdiş nîyo û wina vat: “Lazim o no qirkerdiş çarçiweya sucêy merdimantî de bêro nirxnayîş. Înkarkerdişê qirkerdişî ya ke hetê hukimata demkî û Serektîya Fermandartî, çîyo ke merdim mîyanê ecêbmendişî de verado nîyo. Semeda ke hêrişêy verîya nika zî bi heman mezgî ameyo kerdiş û dima zî heman mezgî reyde ameyo înkarkerdiş. Berdelê qirkerdişê sîvîlêy bê gune xeylê giran o.”
Komel zî verpersîyar a
Fîncanci derheqê qirkerdişî de ciresna ke komel zî qirkerdişî ra verpersîyar o û wina vat: “Tayîn ne tede zaf kesan mîyanê şarî de hezey ke qet çî nêameyo kerdiş têgêrenîy. Qirkerdişê Roboskî ra çend rojî dima semeda serrneweyî fîşekê hewayî ameyî teqnayîş. Semeda 34 ciwanan ke zafaneyî înan doman bî rê ma bêxra tazîyegirewtişî sewbîna çîyo merdimtî û wijdanî nêkerd. Heman awayî semeda 31 ciwanêy ke Pirsûs de ameyî qetilkerdiş zî bertekêy xo nîşan nêday. Tirkîya de seyî ke çî nêbîyo cuyayîşê xo berdewam kenîy. Wexto ke dewlet vano ‘metroyî de beno ke bombe biteqo’ û komel terorîze keno, aye wext yeno vatiş ke ‘ez otobusê nê wenîşina.’ Baş o aye wext hende ciwanêy ke amey kiştiş çi bîy? Gelo semeda ke no bi temamî bandor nêkerd, muhîm nîyo qey? Bêxra merdimêy ke êş ancenî veng nîno sehkerdiş û lazim o heme şarêy Tirkîyayî bi lezgînî peynîya no şîyîşî bigîrî.”
Helwest nîşan bidê
Fîncanci peynîya qalîkerdişê xo de vat: “Hetê mîyannetewî ra bertekêy ke ameynê teselîkerdiş nêame nîşandayîş. Lazim o Neteweyêy Yewbîyîşî derheqê qirkerdişê Zergelê de helwesta xo nîşan bido. Werte de sucê ke şerî esto. Hêrişek hemverê raşteyê sîvîlan esto. Coka lazim o dezgeyê mîyannetewî dijî no bivecîy. Labelê ez nê bawer a ke no babet de durist têbigêrîy.”
Vernîya qetlîyaman akenoVernîya qetlîyaman
Fîncani ard ziwan ke Tirkîya ravêreyeya ke giran ra vîyarêna û wina domna: “Ma mîyanê pergalek ke cenazeyanê YPG/YPJî binê germahîya 50 pîleyî de dayo vindertiş û dewa Zergelê ya Qendîlî de sîvîlan qir kerdo de cuyenê. Rayîrberê Tirkîyayî heta nika her tim sucêy ke kerdo sero nêameyo cezakerdiş û lazim o peynîya ferasetê cezanêkerdişî bêro ardiş. Qirkerdişê Roboskî sero 3,5 serre vîyarto la heta nika ti kes nêameyo cezakerdiş. No zî beno sebeb ke vernîya qirkerdişanê bînan biakero.”